Walay kausaban sa ipatumang protocol sa Mactan Cebu Internation Airport (MCIA) kalabot sa moabot nga mga returning overseas Filipino (ROF) ug overseas Filipino worker (OFW).
Kini ang giklaro ni Lapu-Lapu City Mayor Junard Chan nunot sa hulga sa Indian variant sa coronavirus disease 2019 (Covid-19).
Ang Department of Health (DOH) misugyot alang sa taas-taas nga panahon nga ikuwarentina ang usa ka manguliay nga Pinoy gumikan sa Indian variant nga giingong dugay nga ma-detect.
Alang kang Chan, wala siya mabalaka sanglit inig kahuman nga magnegatibo ang usa ka ROF ug OFW, inig abot sa tugpahanan sa Mactan, ipaubos gihapon kini sa monitoring sa iyang panimalay sa mga Barangay Health Emergency Response Team (Bhert) sulod sa 7 ka adlaw.
Gibutyag ni Chan nga sa pagkakaron ang kinahanglan ra sa ROF ug OFW mao ra ang pagnegatibo niini sa reverse transcription polymerase chain reaction (RT-PCR) test inig abot sa tugpahanan.
Samtang maghuwat sa resulta sa iyang RT-PCR test, ang ROF ug OFW adto una kini ipahimutang sa usa ka hotel.
Ug kun mag negatibo na hayan mahimo na kining makauli diritso sa iyang panimalay.
“Wa ta mabalaka kay fully monitored even though naa kas imong family on the 7th day pwedi ka e-check ug para maka save sila instead of they will stay sa hotel they will stay sa ilang family,” matod ni Chan.
Samtang gipadayag usab ni Chan nga padayon usab ang iyang baroganan nga ablihan ang dakbayan sa mga langyawng turista bisan sa hulga sa Indian variant.
Kini gumikan kay alang sa mayor makita sa datos nga nagkaubos ang kaso sa Covid-9 sa dakbayan.
Gani niadtong Mayo 11, zero case ang natala sa dakbayan nga maoy labing unang higayon nga nahitabo sukad sa miaging tuig.
Ang rekisitos ra sa mga langyawng turista nga gusto mobisita sa dakbayan mao nga sila fully vaccinated ug makapakita ug negatibong RT-PCR test 72 oras sa dili pa ang ilang pag-abot.
Padayon pa hinuong naghuwat si Chan sa go signal gikan sa Inter Agency Task Force (IATF) sa kaulohan kalabot sa pagtugot na sa mga langyawng turista.
“Atong suwayan nga we will do bubble here. Ari lang sila sa Lapu-Lapu. Daghan man sila mahimo sa atong syudad. We have the Olango island which is ecotourism and we have these beautiful beaches,” matod ni Chan. (GCM)