Kaduha-duhaan pa kon mahuman ang unang phase sa Bus Rapid Transit (BRT) sa Dakbayan sa Sugbo, kansang target sa Disyembre 2021 mahuman.
Si Cebu City Councilor James Anthony Cuenco, committee on transportation chairman sa Konseho, nagduha-duha nga ang BRT makapasiuna og operate karong tapos sa 2021.
Ang target sa Department of Transportation (DOTr) sa BRT nga mahuman ang unang phase nga manukad sa Cebu South Bus Terminal (CSBT) padung Cebu Provincial Capitol sa mga eskina sa Osmena Boulevard ug Escario St. sa Disyembre.
Matod ni Cuenco nga sa tanang mga proseso nga agian sa BRT project, siya nagduda kon makuha ba ang target.
“Di nalang gyud ko mo-expect ani nga mahuman ni og December,” matod ni Cuenco sa usa ka interview sa Mayo 12, 2021.
Sa iyang pagpakigtagbo tali sa pipila ka mga representante sa BRT project, nasayran ni Cuenco ang mga proseso nga target sa DOTr nga mahuman karong Mayo.
Matod ni Cuenco nga ang technical service consultant nakigtambayayong tali sa updated implementation sa National Economic and Development Authority (Neda), lakip na ang cost ug scope sa phase, nga gitinguhang mahuman ning buwana.
Dugang ni Cuenco nga lain pa mao nga ang pundo di mapagawas sa Department of Budget and Management (DBM) kay nagkinahanglan kini og patugot sa Neda.
Sa interbyu niadtong Enero 2021, si Cuenco nisulti nga ang civil works sa unang phase sa BRT sugdan unta niadtong Abril 2021, apan wa kini mahitabo.
“I doubt it very much. Unless ang makadaog nga bidder ilang pa-trabahuon 24/7 unya double, triple shift (Unless the winning bidder will work 24/7 with double, triple shift,” nagkanayon si Cuenco.
“I don’t know, but it’s hard. That is assuming if all the conditions are met within the month of May, (but) what if August pa?,” dugang niya.
Si Cebu City Mayor Edgardo Labella, sa iyang bahin, masaligon nga ang DOTr makaigo sa iyang target.
“We have (a) continuous dialogue with them and they assured us that it will go as planned,” matod ni Labella. (JJL)