GISUSPENDE ni Davao City Mayor Sara Duterte-Carpio ang tanang klase ug pagsagop work-from-home nga paagi sa tanang buhatan sa gobyerno sugod karong adlawa, Mayo 14, hangtud Mayo 15 tungod sa Bagyong Crising.
Miisyu si Duterte-Carpio pinaagi sa Proclamation Order 1 Huwebes sa hapon, Mayo 13, nga nagdeklara og pagsuspende sa tanang klase sa pampubliko ug pribado eskuwelahan gikan kindergarten hangtud sa post-graduate studies.
Nagmanado sab ang mayor sa pagsagob sa sa work-from-home nga paagi sa mga buhatan sa gobyerno, ma-nasyonal man o lokal nga mga opisina, naglakip sa mga government-owned ug controlled corporations, gawas lang sa mga buhatan sa "safety and security, health, social services and disaster" nga maoy molihok panahon sa emerhensiya, katalagman ug Covid-19 response ug kalihukan sa pagbakuna.
Samang "exception" ang giduso ngadto sa mga empleyado nga maoy molihok panahon sa emerhensiya, katalagman ug Covid-19 response ug pagbakuna apan di ubos sa mga buhatan nga nahisgutan sa itaas.
Dugang pa niya nga mga pribadong buhatan ug establisemento mahimong magsuspende sa trabaho sa nahisgutang mga petsa depende sa kaugalingong diskresiyon.
Gitumbok ni Duterte-Carpio ang giisyu nga Severe Weather Bulletin 3 gikan sa Philippine Atmospheric, Geophysical and Astronomical Services Administration (Pagasa) nga ang Bagyong Crising nga dunay tropical cyclone warning, nag-indikar sa mata sa bagyo nga naa sa sa gibanabana nga 330 kilometros sa sidlakan sa siyudad sa Davao sukad alas 10:00 sa buntag ug dunay gikusgon sa hangin nga 65 kilometros matag oras (km/h), bugso-bugso hangtud 80 km/h ug milihok sa kasadpan ngadto sa amihanang kasadpan sa 10 km/h.
Sukad alas 11 sa buntag sa Huwebes, gikanayon sa Pagasa nga mga mosunod nga mga lugar gipailawom sa signal number 2: Davao Oriental, Boston, Cateel, Baganga, Davao de Oro, Compostela, Montevista, Monkayo, New Bataan, Surigao del Sur, Lingig, City of Bislig, Agusan del Sur, Trento, ug Santa Josefa.
Samtang signal number 1, mao ang Davao City, ug uban pang bahin sa Davao Oriental, ubang bahin sa Davao de Oro, Davao del Norte, ubang bahin sa Surigao del Sur, ubang bahin sa Agusan del Sur, Bukidnon, Impasug-Ong, Malaybalay City, Cabanglasan, San Fernando, Quezon, Valencia City, Lantapan, Maramag, Dangcagan, Kitaotao, Don Carlos, Kibawe, ug Damulog. (Ralph Lawrence G. Llemit)