Camp Sawi. Camp Wagi. Pamilyar, di ba? Sa pagkatinuod, naa ra kini sa usa ka dapit ug tipik lang sa usa sa mga maanindot nga tourist attraction sa Lungsod sa Bantayan, mga isla sa Bantayan, amihanang Sugbo.
Nahimutang kini sa Oboob Mangrove Garden Integrated Ecotourism Conservation Association (Omaciega) sa Barangay Oboob. Ang mangrove forest usa sa mga lugar nga kinahanglan imong duawon kon ikaw naa sa isla.
Unsa may anaa sa lasang? Of course, ang kabakhawan nga labong kaayo. Sa kainit sa panahon, kaanindot tagamtamon sa bugnaw nga huyohoy sa hangin nga mosapigad sa imong panit. Kon way daghang bisita, kaanindot paminawon sa kanaas sa mga dahon nga nagbag-iray samtang gihuyop sa hangin gikan sa kadagatan.
Di usab magpalupig ang kalanggaman nga magpadungog sa ilang mga awit. Sa among pagduaw, akong nadunggan ang tingog sa antulihaw (oriole) bisan kon di makita kay idlas sa mga mata ang mao nga matang sa langgam.
Sa kilid sa lasang, naay mga payag diin mahimo kang mopahuway sa makadiyot aron tagamtamon ang kaanindot sa berdeng palibot ibabaw sa tubig sa dagat.
Duna usab silay payag diin dunay tsetseriyas nga baligya ug mahimo kang manglawog sa mga isda. Yes, makapanglawog ka sa mga isda. Makapalit ka kanila og lawog sa mga isda. Makalingaw tan-awon ang mga isda nga mag-ilugay sa lawog nga imong itagak ngadto kanila samtang ikaw magsud-ong.
Sa payag diin ka makalawog sa mga isda, naa usab ang ilang gitawag og bamboo tower. Sa itaas, imong malantaw ang tibuok lasang ug makita ang kadagatan sa unahan. Dinhi, imong makita ang kaanindot sa gama sa Ginuo.
NAHIMUTANGAN
Ang mangrove reserve naa sa Barangay Oboob, interior nga dapit sa lungsod, apan daplin sa dagat. Nahimutang kini mga 800 metros gikan sa highway. Naa kini sa wala nga bahin kon gikan sa lungsod sa Santa Fe nga maoy dunggoan sa tanang barko gikan sa Hagnaya, San Remegio sa mainland Cebu.
Imong bantayan ang arko nga Bantayan. Mga usa ka kilometro kapin gikan niini, naa ang eskina padulong sa Oboob, diin imong maagian ang tunghaan sa barangay.
Dunay entrance fee nga P50 matag tawo. Mas mahal kon mogamit ka og kayak nga maabangan sa tag P150. Makalingaw hinuon kay makalibot ka sa tibuok lasang pinaagi sa pagbugsay.
Naa sulod sa mangrove forest ang mga arko sa Camp Sawi ug Camp Wagi. Tungod sa kaanindot, Instagramable ang imong mga selfie. Makapili ka, kalasangan o dagat ang imong background. Mas nindot ibisita sa weekdays kay gamay rang tawo.
Naa usab ang ilang restaurant nga nag-serve og lamian nga seafoods.
UNSAON PAG-ADTO
Sakay og Ceres bus gikan sa SM City Cebu. Aron di ka mahasol, sakyi ang bus nga mobiyahe hangtod sa lungsod sa Bantayan. Ang pletihan tag P285. Ang pletihan usab sa barko sa Hagnaya P185 ra.
Mas makadaginot ka kon kahibawo ka momaneho og motorsiklo kay mahimo ka rang makaabang sa tag P250 sud na sa usa ka adlaw nga gamit.
Timan-i, daghan pang maanindot nga dapit nga angay bisitahon sa isla sa Bantayan, diin ang puti nga kabaybayunan sa Santa Fe ug tin-aw kaayong tubig sa dagat magpangamay.