Karong Lunes na gyud, Mayo 17, ang pagpili sa Ms. Universe 2020.
Nalangay ang pagpili tungod sa pandemic (mora sab og wa mo nahibaw noh?).
Gawas kang Miss Universe Philippines Rabiya Mateo, ganahan sab ko sa mga nawong nila ni Ms. Aruba ug Ms. India.
Syempre, pulos mga gwapa ang nangapil mao bitaw nang sila ang gitugyanan sa mga nasud nga mahimo nilang representante. Hehe.
Kon nakamatikod mo, panagsa ra ko maghisgot ni Rabiya apan wa kana magpasabot nga wa koy pagsalig niya.
Gani, apil ko sa daghang mga magdadayeg niya nga nahingangha sa adlaw-adlaw nga pag-usab-usab niyag aura.
Di lang gyud ko ganahan nga magsigeg yawyaw bahin niya kay basin masobrahan. Kahibalo na mo, duna bayay mga tawo nga dali mapul-an.
Kon usa o duha nila mga judges... patay!
Pero maghiusa ta pagsuporta ni Rabiya kon dunay mga angay botahan, mobotar ta.
Mokuot ta sa atong pitaka. Pila ra man god nang load god. Pirme man gani ta mogasto sa mga video games nga way padulngan.
Kana pang para itabang sa atong kandidata? Apili sab ninyog pag-ampo. Anà ra god. Simpol!
* * *
Sukwahi sa nanglabayng semana, giganahan ko sa Your Face Sounds Familiar adtong Dominggo.
Nalingaw ko sa mga dagway nila Lei Reposposa isip Imelda Papin, Geneva Cruz isip Toni Braxton ug Christian Bables isip Mike Hanopol.
Usbon ko pag-ingon nga tungod sa ulohan sa bangga nga naghisgot sa nawong, dapat masuon gyud sa mga make-up artist ang dagway sa mga celebrity nga gisundog sa mga contestants.
* * *
Nakatayming ko sa pelikula nga “Inferno” nga gisunod sa nobela ni Dan Brown ug gibidahan ni Tom Hanks.
Taudtaud na nakong nabasa ang nobela pero nalingaw pa gihapon ko sa pelikula.
Ang numero unong hinungdan mao nga relevant kaayo ang tema nga mao ang virus nga ginganlag inferno ug nga gihimo sa usa ka scientist nga gustong kuhaan ang daghan na kaayong tawo sa kalibutan aron kuno mas magmalipayon ug haruhay ang mahibilin sa ilang pagpuyo sa kalibutan.
Di ba ingon sab niini ang duda sa mga tawo sa dihang mikatap ang corona virus? Kon mataymingan ko nig usab (sa Fox Movies man tingali to), motan-aw ra gihapon ko.
Makalingaw ang ginukdanan ug ang pagkabisto sa mga pagbudhi sa daghang mga characters nga atong gituohan sa una nga kauban ni Tom Hanks isip Professor Robert Langdon.
* * *
Duna gyud ni gibati si Sharon Cuneta nga wa mahibaw-i sa kadaghanan. Kalit lang nilupad gawas sa nasud kay gusto kunong makaginhawa, matibuok og usab ug magpabalik sa iyang kusog.
Ambot lang. Mahibaw-an ra ni ngadtongadto. Atangi.