UNSA may mahitabo sa senior citizen nga mahatagan og second dose sa Sinovac vaccine nga sayo kaayo kaysa iyang schedule? Ang akong higala si Engr. Alfredo Rafinan, Jr. gibakunahan sa iyang unang dose sa Sinovac vaccine niadtong Abril 24, 2021 sa Robinsons Galleria, Cebu City, kuyog kanila ni Boy Sato ug kanhi Dumanjug Mayor Tomas Garcia. Sumala sa vaccine card, ang iyang second dose unya pa sa Mayo 24.
Niadtong Mayo 6, nakadawat siyag text message nga pa-adtuon siya sa sa Robinsons Galleria. Pagka-ugma miadto siya sa maong dapit dala ang iyang vaccine card nga maoy iyang gipakita ngadto sa mga tawo nga maoy miatubang kaniya.
Human makita ang iyang vaccine care miingon kadtong upat ka mga tawo, nga iyang gituhoan nga doctor, nga mahimo na siyang bakunahan sa second dose. Bisan kon nasayud siya nga unya pa sa Mayo 24 ang iyang schedule apan mituo siya kay sila man ang mga eksperto kalabut sa pagpamakuna.
Ang pangutana, gituyo ba kadto sa mga tinugyanan sa Robinsons Galleria vaccination site o nasayop lang sila? Wala bay dautan nga mahimo ang pagbakuna sa second dose nga mas sayo kaayo kaysa gikatakda? Ma-ihap na ba kadto nga second dose niya bisan kon sayo kini og 17 ka adlaw kaysa gikatakda? Makahimo ba diay pag-usab ang mga tinugyanan sa vaccine site sa nahisulat sa vaccine card? Kon buot kamo og dugang kasayuran sa maong hitabo, mahimong mapangutana ninyo si Teofy Gutang, MILO focal head sa Bgy. Capitol Site, Cebu City.
* * *
Usa sa mga pulitiko nga wala na magpakita sa publiko human mapildi sa presidential elections niadtong 2010 mao si Gilbert “Gibo” Teodoro. Napildi siya sa iyang ig-agaw nga si Noynoy Aquino. Sa dihang midaug si Davao City Mayor Rodrigo Duterte niadtong 2016, gitanyagan siya pagka-kalihim sa Department of National Defense (DND) apan iya kining gibalibaran. Mao kini ang iyang pwesto sa administrasyon ni Presidente Gloria Arroyo.
Daghang nakadayeg niining Gibo tungod sa limpiyo niyang record sa dihang nag-alagad pa siya sa nasud. Gikan sa pagka-kongresista hangtud nahimong secretary sa DND. Mao unta kining matang sa pulitiko nga angay magpadayon pag-alagad sa nasud. Hinaut pang mobalik siya sa pagpapili sa bisang unsang pwesto sa gobiyerno.
* * *
Naalkanse og P14 milyones matag adlaw ang Philippine Charity Sweepstakes Office (PCSO) tungod sa iligal nga small town lottery (STL) ug masiao dinhi sa Cebu City ug Mandaue City lamang. Pagkadaku diay og kitaon niining mga pinansiyer sa iligal nga STL mao nga aduna silay ikabayad aron dili sila hilabtan sa mga mananakop. (msr1144@yahoo.com)