Sugdan ang face-to-face classes sa unang 50 ka mga eskuylahan sa Central Visayas sa school year 2021-2022. Si Department of Education (DepEd) 7 Director Salustiano Jimenez niingon nga ang maong mga tunghaan anaa sa kalungsoran sa lalawigan sa Sugbo ug sa mga syudad sa Toledo, Bogo ug Carcar.
Giduaw sab ni Jimenez ang mga tunghaan nga giproponer alang sa face-to-face classes sa isla sa Camotes, Cebu ug sa mga lalawigan sa Bohol, Negros Oriental ug Siquijor. Apan wa pay mga tunghaan sa mga syudad sa Danao, Cebu, Lapu-Lapu, Naga ug Mandaue nga gitugotan nga alang sa face-to-face classes.
Sa face-to-face classes, magkita na gyud ang mga magtutudlo ug ang mga estudyante, di sama sa online classes ug sa mga module lang. Sa mga modules, sagad ang mga ginikanan ray motubag. Kuyaw nga ang mga ginikanan maoy mogradwar.
* * *
Malikayan na ang wa damha nga sayop sa mga online classes. Sama sa giingong nahitabo sa usa ka estudyante. Nadunggan sa inahan ang iyang anak nga nagsulti sa iyang kaugalingon samtang naghimo sa homework, “2+5, the son of a bitch is 7, “3+6, the son of a bitch is 9.”
Daling gitawag sa inahan ang maestra sa iyang anak aron klaruhon kon mao ba kadto ang iyang gitudlo. Nikatawa lang ang maestra ug miingon, “Ang akong gitudlo sa imong anak, 2+2 THE SUM OF WHICH IS 4.”
Sa face-to-face classes di na sab makaligoy-ligoy ang mga estudyante nga absinero ug mga konsentidor nga mga apohan. Sama niadtong apohan nga niingon sa iyang apo, “Tago, Dong kay paingon dinhi imong maestra.” Ingon sa apo, “Tago sab, Lolo, kay ako ra bang pasangil pag-absent nako nga namatay ka.”
* * *
Apan luwas ba ang maong mga eskuylahan alang sa face-to-face classes taliwa sa Covid-19 pandemic? Si Jimenez niingon nga ang maong mga tunghaan gisusi na alang sa pagpatuman sa social distancing, mga handwashing facilities, face mask ug alcohol ug mga safety protocol markers.
Ang pagbukas sa maong mga eskuylahan alang sa linawas nga klase, matod niya, kasabutan tali sa eskuylahan, lokal nga kagamhanan, parents-teachers association ug DepEd aron pagseguro sa kaluwasan ug seguridad sa mga estudyante.
Matod ni Jimenez nga isip kabahin sa safety measures 50 porsyente lang ang gitugotan nga kapasidad sa mga tinun-an sa matag lawak-saringan. Tungod niini, adunay scheduling nga ipatuman sa matag tunghaan aron ipatuman ang physical distancing.