PRO 7 mitampo og 5 ka kanding, food packs sa Mambaling mosque

Niduyog ang Police Regional Office (PRO) 7 sa kasaulogan sa Eid al-Fitr timaan sa pagtapos sa Ramadan o usa ka buwan nga puasa sa mga sumosunod sa tinuohang Islam sa tibuok kalibotan. Dakong kini kapistahan sa mga Muslim.

Ang PRO 7 nitampo og lima ka mga buhing kanding ug food packs sa mga Muslim nga nagsaulog sa ilang mosque sa Barangay Mambaling, Dakbayan sa Sugbo.

Si Police Brigadier General Ronnie Montejo, hepe sa PRO 7, nagkanayon nga ang ilang gihimo mao ang pagpasalamat sa tabang sa Muslim community sa Sugbo.

Matod ni Montejo, dako sila og natampo sa kahusay ug kalinaw sa mga kalihukan sa tibuok rehiyon.

“Kini isip panag-igsuonay, nya pasalamat sad sa ilang contribution sa ato labi pa sa pagmintinar sa peace and order situation. Nakigtambayayong man sad sila. Nakighiusa ta sa ilang pagsaulog Eid al-Fitr,” matod ni Montejo.

Matag panahon nga adunay mga relihiyusong kalihukan sa Dakbayan sa Sugbo mag-una ang Muslim leaders nga motabang sa kapulisan sa pagbantay nga walay makasulod sa ilang grupo nga mga kriminal gikan sa Mindanao.

Matod ni Police Colonel Josefino Ligan, hepe sa Cebu City Polie Office (CCPO), ang National Commission on Muslim Filipinos kanunay ang pakig-alayon labi na sa mga panghitabo sa Mindanao dungan sa pasalig nga dili maabot dinhi ang kagubot.

Nagpasalamat usab ang imam sa mosque sa Mambaling nga si Mohamad Helmie Daud Abemor sanglit makaduha na kini ka higayon nga si Montejo nihatag og hinabang sa mga Muslim sa siyudad.

Tungod niini, gipasalig niya nga andam sila kanunay nga motabang sa kapulisan nga walay mga dautang elemento nga makasulod sa Sugbo pinaagi sa pag-monitor uban sa ilang mga kaliwat sa Mindanao.

Sukad pa kaniadto, ang PRO 7 nirespeto sa mga kalihukan sa mga Muslim sa Central Visayas, dugang ni Montejo, adunay unit sa kapulisan nga gidumala usab sa mga Muslim nga police personnel. (AYB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph