Usa nalang ka barangay sa Dakbayan sa Sugbo ang adunay lapas sa 20 ka aktibong kaso sa coronavirus disease (Covid)-19 sa nakalabay nga 10 ka mga adlaw.
Base sa record sa Emergency Operations Center (EOC), bugtong ang Barangay Guadalupe maoy adunay 24 ka active cases gikan sa 54 ka barangay nga adunay active cases.
Sa mga barangay nga adunay active cases nga nagsunod nga Guadalupe, lima kanila nag-double digits.
Kini ang Barangay Lahug, Mabolo ug Tisa nga adunay tag 15 ka aktibong kaso, Banilad adunay 12 samtang 10 ang Tisa.
Si Konsehal Joel Garganera, deputy chief implementer sa EOC, nipahibawo nga 367 nalang ka aktibong kaso ang nagpabilin sa Cebu City.
Niadtong Mayo 12, ang Cebu City ni-swab sa 1,415 ka mga individual ug 3.04% ang nagpositibo apan di angay ikabalaka sanglit sulod na sa duha ka mga semana, ang positivity rate nag-average og ubos sa 5% nga maoy timailhan sa WHO nga luwas ang usa ka lugar gikan sa pagkuyanap sa Covid-19.
Kini sukwahi kaayo sa dagan sa pagpanakod sugod niadtong tunga-tunga sa Enero hangtod sa uwahing bahin sa Marso.
Dihang nisulbong og balik ang mga kaso sa Covid-19, kasagaran three digit ang average matag adlaw.
Dihay adlaw nga niabot pa kini og kapin sa 300, apan tungod sa subsob contact tracing ug estriktong pagpatuman sa mga health protocolm anam kining miubos.
Sa kinatibuk-an, niabot na og 260,778 ka mga individual ang nakuhaan og sample sa Covid-19, 23,710 ang nagpositibo kun 9.09% positivity rate.
Apan hingpit nang naalim sa maong sakit ang 22,488 ka individual kun 94.85% recovery rate, apan 855 ang nangamatay. (PAC)