TUNGOD sa aksidente, usa ka gikatahapang karnaper nadakpan sa kapulisan Miyerkules sa hapon, Mayo 12, 2021 sa Barangay Talamban, Dakbayan sa Sugbo.
Matod ni Police Executive Master Sergeant Tirzo Plania, imbestigador sa Canduman Police Station sa Mandaue City Police Office (MCPO), gi-hold sa Talamban police sa Cebu City Police Office (MCPO) si Alfred Ygot Santillan, 37, ulitawo, taga Yati, lungsod sa Liloan human makabangga og motorsiklo.
Wa masayod pa ang Talamban police nga ang ilang gi hold suspek diay sa pagkarnap sa itom nga multicab nga maoy gimaneho ni Santillan atol sa hitabo.
Ang multicab nga gibutangan og peke nga numero sa plaka, NE 8879, iya ni Leonardo Luage Borbon, 27, ulitawo, taga Purok Chikos, Barangay Tawason, Dakbayan sa Mandaue.
Ang multicab giingong gikarnap ni Santillan mga usa ka oras kapin sa wa pa makabangga sa motorsiklo.
Mga alas 3 sa hapon sa Huwebes, Mayo 13, si Luage nisusi sa multicab nga iyang giila nga iyaha base sa nakuha nga registration sa sakyanan ug mga timailhan pang uban niini.
Matod ni Plania nga si Santillan napriso na niadtong 2018 tungod sa pagkawat sa motorsiklo sa usa ka pulis.
Paglabay og usa ka tuig, nakagawas kini pinaagi sa plea bargaining.
Matod ni Plania nga ilang nautingkay ang record ni Santillan tungod kay ang ilang operasyon hiniusa tali sa Talamban police ug Highway Patrol Group (HPG) Central Visayas.
Sa Mayo 17, pasakaan og karong carnapping si Santillan, kinsa naa karon gipriso sa ilang police station, samtang giandam ang mga dokumento ug ebidensya. (REV)