Trese ka mga tahi ang gikinahanglan aron masirado ang samad sa wala nga mata sa usa ka trabahante sa business process outsourcing (BPO) ug negusyante og buy and sell human siya madasmag sa usa ka naninda og ice cream nga ni counterflow sa bike lane sa V. Rama Avenue, Dakbayan sa Sugbo.
Alang kang Lanz Laurence Limsiaco Lopez, 29, taga dan Escario, Dakbayan sa Sugbo, swerte siya nga nasamad mao lang ang iyang tabontabon, wala ang iyang kalimutaw nga nagbutang sa kakuyaw nga siya mabuta.
Si Lopez, sa interbyu sa Superbalita Cebu, niasoy nga niadtong Martes, Mayo 11, 2021, sa alas 4 sa hapon, nagsakay siya sa iyang mountain bike padung unta sa Dakbayan sa Naga gikan sa ilang balay sa dan Escario.
Pag-abot sa V. Rama Avenue, samtang siya nagsubay sa bike lane, dunay nigawas nga traysikad nga karga ang ice cream sa eskina sa karsada kilid sa usa ka motel.
Matod ni Lopez, nagtuo siyang mosubay sa bike lane ang drayber, hinungdan nga nipahinay siya sa pagpadagan.
Kay wa man mosubay sa bike lane, nipakusog siyag padagan, apan kalit nga nisulod ang driver sa bike lane, ni-counterflow hinungdan nga sila nagkabangga.
Naigo ang iyang ulo sa steel nga atop sa side car nga maoy hinungdan sa pagkabuak sa iyang glasses, ang bildo niini nangalubong sa iyang wala nga mata.
“Maayo gani naay niabot nga patrol car sa Station 6, maoy nanawag og ambulansya,” asoy ni Lopez.
Gidala siya sa Chong Hua Hospital, diin gikuha ang mga tipaka sa iyang glasses nga nangalubong sa iyang wala nga mata.
Gitambagan siya sa pagpa admit aron masuta kon unsa ka dako ang kadaut sa iyang mata, apan wa siya mosugot kay di siya ganahan sa pagpailawom sa swab test.
Pagka ugma, Miyerkules, Mayo 12, niadto siya sa eye clinic sa Cebu Doctors University Hospital, diin dugang pipila ka gamay nga mga tipaka ang nakuha gikan sa iyang samad.
Matod ni Lopez nga igo ra niyang pabayran ang iyang nagasto sa pagpatambal sa iyang mata.
Di na siya maningil sa mga adlaw nga wa siya makatrabaho ug makanegusyo kay nasayod siya nga ordinaryo ra ang panginabuhi sa tigbaligya og ice cream.
Matod ni Lopez nga tungod sa hitabo, andam siyang mag volunteer sa pagbantay ug pagpatuman sa ordinansa sa bike lane sa Dakbayan sa Sugbo. Si manlalaban Gerry Carillo, chairman sa Sugbo Bike Lanes Board, niingon nga ilang susihon ang hitabo.
Gusto unta siyang ipakatap na ang mga sakop sa Bike Patrol, apan nagpadayon pa ang ilang training. Ang iyang gikagul-an mao nga sa 30 nga unang hut-ong sa recruit, pito lang ang nakapasar sa post training exam. (REV)