SUPERBALITA CEBU

5 ka pasyente sa Covid-19 gikawatan og cell phone

(Tampo sa City of Naga Police)

Lima ka mga pasyenteng positibo sa coronavirus disease 2019 (Covid-19) gipangtulis sa tulo ka mga lalake sa isolation center sa alas 3 sa kaadlawon sa Biyernes, Marso 14, 2021 sa Barangay South Poblacion, Dakbayan sa Naga.

Duha sa mga suspek nadakpan sa follow-up operation sa kapulisan sa dakbayan.

Mga suspek nga puro taga Dakbayan sa Naga giilang sila si Francis Obanos Misenabre, 23, ulitawo, taga Sitio Tapon, Brgy. Tinaan; Denver Sanchez Dagohoy, 39, minyo, taga Purok Talong 2, South Poblacion; ug Saddam Villarino, taga Brgy. South Poblacion.

Matod ni Police Lt. Colonel Nelson Sardin nga samtang ang lima ka mga biktima, kinsang mga ngan gipugngan isip mga pasyente sa Covid-19, nangatulog, sila si Misenabre ug Villarino nangatkat sa paril sa isolation center.

Dihang nakasulod na sa compound, giguba sa tulo ang pultahan. Adunay 12 ka mga pasyente nga nangatulog sa compound.

Ila dayong gikuha ang unom ka mga cell phone sa lima ka mga pasyente.

Si Police Master Sergeant Jake Catane, imbestigador, nibutyag nga ang mga suspek nitambong og birthday party sa balay tupad sa isolation center.

Base sa kuha sa close circuit television (CCTV), ang gwardya sa pasilidad maoy gibantayan sa tulo. Si Dagohoy nga maoy lookout, nilingaw sa pagpakigsulti sa gwardya aron malipat.

Nakahigayon sa pagsulod sa center sila si Misenabre ug Villarino, ningkamang dayon ug nigisi sa mga tabil sa mga cubicle sa mga katre sa mga pasyente.

Sa 12 ka mga pasyente, lima ra ang ilang nakuhaan og cell phones.

Gilusad gilayon sa kapulisan ang hot pursuit operation nga niresulta sa pagkasikop nila ni Misenabre ug Dagohoy. Sa pagsuwat ning taho, si Villarino wa pa madakpi sa kapulisan.

Si Police Staff Sergeant Organe Lungtad sa Naga police, sa interbyu sa Superbalita Cebu, niingon nga sila si Misenabre ug Dagohoy ilang gilain sa pagbilanggo kay itakda pa ang pag swab test kanila.

Naa nila kini gisulod sa usa ka bakanteng selda.

Iya usab nga gihulagway si Misenabre nga banggiitan nga kawatan kay sukad sa bata pa, mao na kini ang buhat niini.

“Kana si Francis, bisan adtong minor pa na, magsige na nag balikbalik dinhi,” matod ni Lungtad.

Upat ka mga kasong robbery ang gipasaka sa kapulisan sa Biyernes batok sa tulo kay ang ikalimang pasyente nakalarga na sa Metro Manila.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph