PADAYON ang imbestigasyon sa kapulisan sa gi-ambush patay nga kolektor sa utang alas 3:15 sa hapon, Huwebes, Mayo 13, 2021, sa Midsayap, North Cotabato.
Ang biktima mao si Michael Borja Delos Santos, 32, minyo, private lending collector ug nagpuyo sa Barangay North Manuangan, Pigcawayan sa nahisgutang probinsiya.
Nasayran gikan kang North Cotabato Provincial Police Office Director Colonel Henry Villar nga sakay ang biktima sa iyang motorsiklo sa Barangay Tumbras sa maong lungsod gikan nangolekta og pautang sa iyang gitrabahoan nga kompaniya.
Apan pag-abot niya sa ngiob nga lugar sa Sitio Damagi sa maong barangay, kalit mitungha ang tulo ka mga wala mailhing suspek daplin sa kalsada ug dayon nagpusil kaniya.
Patay ang biktima sa lima ka mga samad sa lawas samtang mga suspek daling miikyas sakay sa duha ka motorsiklo paingon sa hilit nga dapit sa Midsayap.
Gikuha sab sa mga suspek ang kuwarta nga kolekta niini apil ang selpon. (Edgar E. Fuerzas)