MATI CITY, Davao Oriental -- Hapit 200 ka mga Matinians ang mibakwit gikan sa ilang mga panimalay gumikan sa pagbaha nga nasinati tungod sa Tropical Storm Crising Biyernes, Mayo 14.
Base sa ihap sa Mati City Disaster Risk Reduction Management Office (CDRRMO), 157 ka indibidwal sa Barangay Matiao ang gipabakwit buntag sa Biyernes human sa pag-apaw sa mga creek nga midIretso ngadto sa mga kabalayan.
Temporaryong nagpuyo ang mga bakwit sa barangay evacuation center sa Matiao apan nanguli na sab dayon sila sa ilang mga panimalay pagkahapon human miubos na ang tubig sa mga creek.
Sa Barangay Don Enrique Lopez, 12 ka pamilya ang mibakwit nga gilangkuban sa 42 ka indibiduwal. Temporaryo silang nagpuyo sa Pagsilaan Elementary School.
Gawas sa baha, duna usab nareport sa CDRRMO nga pagdahili sa yuta sa Purok Daisy, Barangay Buso ug sa Sitio Biasong sa Barangay Don Salvador Lopez.
Nagapadayon ang operasyon sa Mati CDRRMO inubanan sa mga nagkalain-laing grupo sama sa Braces, Kabalikat Civicom, Jaguar 10, City Traffic Management Office, City Engineering Office ug Dreams 166.
Usa lamang ka panimalay sa Barangay Matiao ang nareport nga totally damaged. (JPC/CIO Mati)