SUPERBALITA DAVAO

Pagbaha, wala na gikakurat?

BMS Responders

DILI na suma pa bag-o sa pipila ka Dabawenyo ang pagbaha sa Siyudad sa Davao kung dunay matigayon nga sagunsong mga pag-ulan, dala sa daut nga kahimtang sa panahon.

Sa mga pagbaha sa Davao City Biyernes, Mayo 14, 2021, sa pinisik sa Bagyo Crising, wala na nabag-o alang sa usa ka Marcial Hermoso, 56-anyos nga taga Bangkas Heights, Toril, Davao City.

"Ay naanad naman ta nga bahaon man gyod ang Davao, gamay'ng ulan mobaha man gyod," sulti niya sa Superbalita.

Alang usab sa usa ka Gregorio Matias, traysikad drayber sa Jacinto Street, Davao City nga bisan pa luyo sa mga pagbutang og dagkong imburnal, wala pa man gihapon nasulbad ang suliran sa pagbaha.

"Dagkong imburnal, tapos ang katunga lapok man gihapon, so useless, pag-ulan, barado gihapon," niya pa.

Luyo sa opinyon sa pipila, nahimo gihapong dako nga tabang ang paningkamot sa Department of Public Works and Highways (DPWH) pinaagi sa mga local government units (LGUs) sa pagpadayon nga road widening ug ang proyektong drainage system.

Depensa sa ahensiya, wala pa nahuman ang dakong proyekto, butang nga maingon sa umaabot nga natubag ang problema sa pagbaha.

Sa hinungaw sa Bagyong Crising sa milabay'ng adlaw, gibaha ang nag-unang dapit sa Davao City.

Nakulgot ang dagan sa trapiko sa Task Force Davao Sirawan checkpoint dihang miawas sa national highway ang tubig sa creek.

Sa Bangkas Heights sa Toril, Davao City, gilunopan sab ang kadalanan ug mga kabalayan nga anaa sa ubos nga bahin sa dapit.

Anaa sab Biyernes sa Code Yellow ang lebel sa tubig sa sapa sa Barangay Mintal, Tugbok District, Davao City.

Sa Bosque sa Crossing Bunawan, gilunopan sab ang kadalanan ug gikabalak-an nga motaas pa ang lebel sa tubig sa Bunawan River sa tubig ulan nga natigom sa bukid nga parte sa Paquibato District.

Gilauman sab ang pagtaas sa tubig sa Davao River sanglit mopaubos sa Bucana ang tubig gikan sa bukid sa Calinan District ning siyudad.

Hinuon 24-oras nga naka-standby ang mga personahe sa uban ang Search and Rescue team sa Central 911 sa pag-rescue sa posibleng mabahaan.

Sumala sa Pagasa, bisan og natunaw na ang Bagyong Crising padayon gihapong masinati sa Davao Region ang katag-katag nga mga pag-ulan gumikan sa nagpasulabi nga low pressure area.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph