PADAYON ang pagsaka sa ihap sa aktibo ug kumpirmadong mga kaso sa Cagayan de Oro human kini mitala og 80 ka mga bag-ong kaso sa coronavirus disease (Covid-19), sumala sa report sa City Health Office Biyernes, Mayo 14.
Miabot sa 5,692 ang kinatibuk-ang ihap sa mga kaso sa Covid-19 sa dakbayan, ug ang mga aktibo nga kaso anaa sa 849.
Matud ni Acting City Health Officer Dr. Lorraine Nery, nakatala ang syudad og 24 ka mga local cases with link, 14 ka mga lokal nga authorized persons outside residence (Apors), 41 ka local index nga mga kaso, ug usa ang patay.
Sumala sa report City Health Office, sa 5,692 nga kinatibuk-ang kaso sa Covid-19, 438 niini mga ROFs/LSIs ug 5,254 ang mga local transmissions.
Ang Cagayan de Oro adunay 849 ka mga active cases, 210 niini na-admit sa Northern Mindanao Medical Center ug uban pang mga ospital sa syudad, 637 ang mga outpatients, ug duha ang mga ROFs/LSIs.
Miubos usab ang recovery rate sa dakbayan nga anaa sa 80.90 persyento.
Nakatala ang syudad og 48 ka mga coronavirus-positive nga mga kaso nga karon naka-recover. Naa na karon sa 4,605 ang ihap sa mga nakarekober.
Sa maong numero, 312 ang mga LSIs, 123 ang mga ROFs, ug 4,170 ang mga lokal nga kaso (community: 3,549; Apors: 621).
Ang ihap sa mga namatay sa Covid-19 sa syudad anaa na sa 238.