Naapektohan ang panginabuhi sa bulangan gumikan sa krisis sa panglawas gikan sa Marso 2020. Sa talaan sa Games and Amusement Board (GAB), dunay 16,173 ka mga lisensyadong cockpit personnel ang nakulban nga naglakip sa mananari, mananambal ug kuyme. Sa Gamefowl Commission ug UA COOP 18,000 ang direktang dunay koneksyon sa sabong industry ang naapektohan.
Ang Internal Research sa San Miguel Corp. 15,000 ka mga tindahan sa gamefowl products ang naangin nga dunay 60,000 ka mga empliyado. Sa Federation of Gamefowl Breeders Association 200,000 ka mga farm employees apektado.
Provincial Board Member Jimbo Borgonia ug Rep. Sonny Lagon nangusog nga mahibalik ang sabong sanglit nakasabot sa panginabuhi sa bulangan. Ilang lakang giabagan sa Breeders Association, Gamefowl Association ug ubang nalakip sa industriya diin gipadangat ang hangyo sa Inter-Agency Task Force (IATF).
Subay niini ang GAB Chairman Abraham Mitra nga gisuportahan sa Department of Health (DOH) misumitir ngadto sa IATF og hugot nga mga lagda sa safety ug health protocol alang sa kasiguroan sa panglawas sa mga mahiligon sa tari. Gihatagan og gibug-aton ang gilatid nga mga lagda maong gipabalik ang bulang sa lalawigan. Apan gipahunong kay wala makapasar sa giimponer nga protocol.
Misiaw ang tigbakay hinungdan nga daghang nangasikop, nabilanggo ug nakamulta. Walay balaud nga nagtugot sa online cockfight labaw na ang tigbakay.
Samtang ang chairman sa Cebu City Gamefowl Commission nga si Konsehal Raymond Garcia mipadangat og rekomendasyon nga buksan ang operasyon sa upat ka mga dagkong bulangan. Ubos sa gahom sa IATF gitugot ang sabong sa mga lugar nga modified general community quarantine (MGCQ) apan wala motugot si Mayor Edgar Labella gumikan sa risgo sa Covid-19.