Human sa hugot nga operasyon sa miaging semana batok sa Small Town Lottery (STL) sa Dakbayan sa Sugbo ug Mandaue tungod sa reklamo sa Philippine Charity Sweepstakes Office (PCSO), namalik na usab og pangabli ang daghang STL outlets libot sa duha ka mga dakbayan.
Unsa kaha kini, mga legal nga STL o illegal nga outlets? Namatikdan nga pipila ka susamang outlets ang nanirado sa miaging semana apan abli na usab karon.
Klaro nga giabusohan, ang STL gihimong takoban sa operators sa illegal nga sugal. Dili ba ang STL namugna aron unta sa pagsumpo sa illegal nga numbers game o masiao? Apan paborable na hinuon kini kanila. Nakadiskarte sa pag-abli og mga illegal nga outlet. Kon mao kini, pakyas ang STL sa iyang nahiunang tumong.
Samtang, dili maayong molugak ang kapulisan sa ilang kampanya aron dili maakusahan nga “pakitang tao” lang ang ilang operasyon ug pagduda nga nagpadayon ang ilang koneksiyon sa operator sa illegal nga sugal sa numero tungod sa pagpamalik sa daghang outlets.
Hinuon, wa usab kita masayod kon nakakuha kini og permiso sa pag-operate. Apan mas maayong masusi og balik aron dili mailad sa atubangan ang kagamhanan.
Si Royina Garma, general manager sa PCSO, nagkanayon nga naalkanse sila og P12 milyones matag adlaw sa STL sa duha ka mga dakbayan tungod sa illegal nga operators apan, wa usab siya mohatag sa insaktong sumada sa ilang kita sa STL dinhi. Nakigtagbo siya sa local chief executives ug opisyal sa kapulisan alang sa giingong pagsulbad sa naasoy nga problema.
Gilusad dayon ang operasyon. apan namalik ra sab ang gipangsira nga outlets. Murag lig-on ang ilang koneksiyon. Dili kaha maayong wagtangon na lang kini? Dakop na lang gyud. Dili na maabusohan. Walay magamit nga magtakoban.