Bisan sa ilaha lang pangalan o inisyal, dili na kinahanglan ang ilang apelyido sa pagsubay sa ilang dakong kalampusan sa natad sa basketball.
Gipangtumbok mao ang National Basketball Association (NBA) legends nga sila si anhing Kobe Bryant, Tim Duncan ug Kevin Garnet.
Ang nangahisgutan nakahakot og NBA titles, MVP awards, Olympic gold medal ug uban pang mga pasidungog.
Apan ugma, Mayo 16, 2021 (RP time) sa Uncasville, Connecticut, ang labing tam-is nga pasidungog matunol na ngadto sa mga nangahisgutan gumikan kay opisyal na silang ipahiluna sa Naismith Memorial Basketball Hall of Fame.
“I like to think that all three of us pushed each other to be the best that we could be,” matod pa ni Garnett sa 2020 dihang nasayran niya naapil siya ning maong tapok.
“To be going in such a class like this, I’m more than honored.”
Sa kinatibuk-an, ang tulo nakahipos og 11 ka NBA titles (tag-lima sila si Bryant ug Duncan), 48 All-Star nods, kapin sa 86,000 career points, ug kapin sa $900 million nga suweldo lang sa NBA ug wala pa’y labot ang ilang kita sa endorsements ug uban pa.
Si Bryant maoy No. 4 scorer sa kasaysayan sa NBA, ika-15 si Duncan ug ika-18 si Garnett.
Si Bryant nipanaw niadtong Enero 2020 gumikan sa helicopter crash. Nag-edad siya og 41.
“When we selected this group for induction, we immediately knew that this would be, maybe, one of the great classes of all-time,” matod ni Jerry Colangelo, pangu sa Hall of Fame Board of Governors.
“I mean, the people going in, the three headliners in Kobe and Garnett and Tim Duncan ... that says it all.” (AP)