Nanamilit ang panagpares sa mga Pinoy nga sila si Jeff De Luna ug Roberto Gomez human sila gipukan sa ilang mga kaatbang gikan sa Estonia, 9-4, sa quarter-finals sa 2021 World Cup of Pool kagahapon, Mayo 14, 2021 sa Stadium MK sa England.
Ang Estonians nga sila si Denis Grabe ug Mark Magi nagkontrolar sa dinumbolay gikan sa sinugdanan hangtod sa katapusan.
Mouli sila si De Luna ug Gomez bawon ang $9,000 nga ganti matag usa isip premyo sa ilang pagsulod sa quarter-finals.
Sila si Grabe ug Magi moabante sa semi-finals diin ilang ikaharong ang panagpares nila ni Joshua Filler ug Christof Reintjes sa Germany.
Ang Pilipinas sulod na sa tulo ka mga higayon nga nakalangkat sa kampyunato ning maong kompetisyon.
Ang magkumpareng sila si Efren Reyes ug Francisco Bustamante maoy naghari niini niadtong 2006 ug 2009 unya sila si Dennis Orcollo ug Lee Van Corteza ang nanghawod niadtong 2013. (ESL)