Tugtan na sa Philippine Basketball Association (PBA) ang ilang miyembrong teams nga makapraktis sulod sa Metro Manila human gibalik ngadto sa general community quarantine (GCQ) ang Covid-19 restriction sa National Capital Region Plus sugod karong adlawa, Mayo 15, 2021.
Asoy ni Commissioner Willie Marcial nga ang teams nga nagtinguhang mopraktis sulod sa capital region kinahanglang magkuha og permits gikan sa local government units (LGU).
Gawas niini, kinahanglang kompletuhon sab sa teams ang tanang protocol lakip na ang duha ka swab tests sa dili pa kini magsugod og training.
“They should send a letter to their LGU and the LGU should grant them permits first before they could start practicing,” asoy ni Marcial nga napatik sa www.pba.ph.
“Also, they should still complete all the protocols. After all these, they can start with their training.”
Ang teams nga segurado nang magpraktis sa Metro Manila sa pagbalik sa GCQ mao ang San Miguel Beermen, Magnolia Hotshots ug Phoenix Super LPG Fuel Masters.
Matod ni Beermen head coach Leo Austria nga magpraktis sila sa naandan nilang venue nga mao ang Acropolis Gym sa Mandaluyong City.
“The players, if they really have the choice, would want to stay here in Manila for the practices and good thing that the government has eased the quarantine measures,” batbat ni Austria.
Sa iyang bahin, si Magnolia coach Chito Victolero nga andam sab silang mobiyahe og layo aron makapraktis kon dili sila makakuha dayon og permit gikan sa LGU.
Mao sab kini ang pamahayag ni Phoenix coach Topex Robinson. (ESL)