Sa sunod niyang tahas, tinguha ni American retired boxer Floyd Mayweather Jr. nga mabuak ang rekord nga napatik sa iyang pagpakigbatok kang Filipino boxing icon Manny Pacquiao niadtong 2015 sa padaghanay og halin sa pay-per-view (PPV).

Ang Mayweather-Pacquiao fight nakahakot og 4.6 million PPV buys ug mikita kini og $410 million nga maoy labing dako sa kasaysayan sa boksing.

Midaog si Mayweather ning awaya pinaagi sa desisyon.

Nagtuo si Mayweather malabwan kining maong mga numero sa iyang pagpakigbatok kang YouTube sensation Logan Paul sa usa ka exhibition bout karong Hunyo 6, 2021 sa Hard Rock Stadium sa Miami.

Gihimong basihan ni Mayweather ang iyang 60 million followers sa social media ug minilyon sab nga followers ni Paul.

Ang exhibition bout ni Mayweather batok kang mixed martial arts (MMA) superstar Conor McGregor niadtong 2017 nakahakot og 4.3 million PPV buys.

Usa sab kini sa gibasihan ni Mayweather kon nganong masaligon siyang makahalin og dako sa PPV ang ilang away ni Paul. (ESL)