Moabot og P3.4 milyunes nga balor sa shabu ang nasakmit sa mga sakop sa Philippine Drug Enforcement Agency (PDEA) 7 inabagan sa Naval Forces Central ug Central Command pinasikad sa search warrant sa usa ka panimalay sa Belgium St., Barangay Suba, Siyudad sa Sugbo.
Ang pagronda nahitabo sa alas 6:30 sa buntag sa Mayo 14, 2021 diin ilang nadakpan ang live-in partners nga silang Jaime Gastador, 43, ug Jocelyn Premacio, 47.
Nakuha kanila ang 17 ka dagkong pakete sa gituohang shabu nga motimbang ang tanan sa 500 gramos.
Matod ni Leia Alcantara, information officer sa PDEA 7, nga tulo ka semana ang gihimong pagpaniid human makadawat sa kasayuran sa illegal nga negosyo sa mga dinakpan.
Giingong nga ang modus sa mga suspek nga mogamit silag mga menor de edad nga himuong tighatod sa illegal nga druga aron dili ma bantayan.
Makabaligya sila og usa ka kilo matag semana diin ang ilang contact naa sa sulod sa bilanggoan, sumala sa kapulisan.
Ang kapulisan nakig-alayon na sa Cebu City Jail male dormitory ug Bureau of Jail Management and Penology sa ilang dugang imbestigasyon.
Kalapasan sa Section 2, Article 2 sa Republic Act 9165 ang atubangon nga kaso sa duha suspek nga naa na karon sa kustodiya sa PDEA 7 headquarters.
Ang Suba usa sa mga barangay sa Dakbayan sa Sugbo nga giila sa kapulisan nga apektado sa pagkuyanap sa gidiling druga. (AYB)