Giawhag ni Lapu-Lapu City Mayor Junard Chan ang duha ka fraternities sa dakbayan sa pagbisita sa iyang buhatan aron maestoryahan ang ilang gamay nga walay pagsinabtanay sa usa ka insidente sa Barangay Marigondon.
Ang fraternities mao ang Tau Gamma Phi ug Alpha Kappa Rho (Akrho).
Ang insidente nakaabot sa buhatan ni Chan human nga adunay nagpadala niya og video sa hitabo diin giingong nagkagubot ang mga miyembro sa duha ka fraternities sa wala pa matinong rason.
Nabalaka si Chan nga gumikan sa hitabo, maguba ang maayong relasyon sa fraternities sa dakbayan nga nagkahiusa sa United Fraternities and Sororities Council (UFSC).
Matod ni Chan, usa kini sa rason nganong aktibo sila sa pagpahigayon og mga kalihukan sa komunidad sama sa pagpamintal, pagpahigayon og coastal clean-up ug outreach program sa kabarangayan.
Kini nakahatag usab og kaikag sa uban sa pagsulod sa fraternities gumikan sa maayo na nilang panglantaw ug imahen sa nagkalainlaing fraternities sa dakbayan.
Apan subo palandongon sumala sa mayor nga mabulingan ang panaghiusa sa duha ka fraternities gumikan sa usa lang ka insidente. (GCM)