SUPERBALITA CEBU

Kaso sa 7 ka miyembro sa SOSN gibasura sa piskaliya, pabuhian

■ GIPANGTANGGONG: Ang unom sa pito ka mga miyembro sa Our School Network (SOSN) nga gitang­gong sa Police Regional Office (PRO) 7. / National Union of People’s Lawyers

Gibasura sa piskaliya sa Davao del Norte ang tulo ka kaso nga gisang-at sa Police Regional Office (PRO) 7 batok sa unom ka magtutudlo sa Save Our School Network (SOSN) ug usa ka datu sa tribung Manobo nga nidala sa mga menor de edad sa Sugbo gikan sa Davao, nga giingong gi-rescue sa mga sakop sa Department of Social Welfare and Development (DSWD).

Pasado alas 9:00 sa buntag sa Mayo 14, niabot sa Regional Special Operations Group (RSOG) 7 ang abogado sa mga akusado nga si King Perez uban sa mga militanteng pundok aron pagpahibalo nga gisalikway sa piskaliya ang tulo ka mga kaso batok sa pito.

Dala nila ang kopya sa resolusyon nga gipirmahan ni Provincial Prosecutor Norman Solis sa Davao del Norte Prosecutor’s Office sa mga kasong Child Abuse Law, Anti-Trafficking in Persons Act ug Kidnapping and Serious Illegal Detention nga gisang-at batok nilang Chad Errol Booc, Segundo Lagatos Melong, Benito Bay-ao, Moddie Langayed Mansimoy-at, Esmelito Paumba Oribawan, Roshelle Mae Porcadilla ug Jomar Benag.

Walay nakita nga basehanan ang piskaliya sa probinsya sa Davao del Norte nga isang-at ang kaso ngadto sa korte tungod kay wala makapresentar ang kapulisan og ebidensya nga magmatuod nga nahimo nga krimen ug wala usab silay huresdiksyon sa maong kaso.

Tungod niini, nimando si Piskal Solis sa PRO 7 nga buhian ang mga dinakpan nga gipangtanggong sa nagkadaiyang police stations sa Siyudad sa Sugbo.

Apan alang kang Police Brigadier General Ronnie Montejo, pangulo sa PRO7, huwaton una nila ang papel nga gikan sa Piskalya sa Davao del Norte dungan sa saad nga tumanon nila kini.

Iya usab nga ipasusi sa mga abogado sa PRO 7 ang maong kaso ug posibling adunay legal nga lakang nga ilang buhaton.

Dugang ni Montejo, ang mga ginikanan na mismo sa mga bata ang misang-at sa reklamo human gidala ang ilang mga anak dinhi sa siyudad sa sugbo nga walay pagtugot kanila, apan hugot kining gihimakak sa SOSN.

Si Perez nagkanayon nga dili na kinahanglan nga magpaabot sa mando sa korte ang PRO 7 sanglit naa pa kini sa piskaliya.

Igo na ang resolusyon sa Prosecutor’s Office nga makapagawas sa pito ug mag-agad sa iyang kliyente kon mosumbalik sa pagkiha sa kapulisan, matod niya. / (AYB)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!