Tungod sa aksidente, usa ka gikatahapang karnaper sulagma nga nadakpan sa kapulisan sa hapon sa Mayo 12, 2021 sa Barangay Talamban, Dakbayan sa Sugbo.
Matod ni Police Executive Master Sergeant Tirso Plania, imbestigador sa Canduman Police Station sa Mandaue City Police Office (MCPO), gi-hold sa Talamban police sa Cebu City Police Office (MCPO) si Alfred Ygot Santillan, 37, ulitawo, taga Yati, Lungsod sa Liloan, human makabangga og motorsiklo.
Wa pa masayod ang Talamban police niadtong higayuna nga si Santillan suspek diay sa pagkarnap sa itom nga multicab nga maoy iyang gimaneho dihang siya nakabangga og motorsiklo.
Ang multicab nga gibutangan og peke nga numero sa plaka, NE 8879, iya ni Leonardo Luage Borbon, 27, minyo, taga Purok Chikos, Barangay Tawason, Dakbayan sa Mandaue.
Ang multicab giingong gikarnap ni Santillan mga usa ka oras kapin sa wa pa makabangga sa motorsiklo.
Mga alas 3 sa hapon sa Huwebes, si Luage nisusi sa multicab nga iyang giila nga iyaha base sa nakuha nga registration sa sakyanan ug mga timailhan pang uban niini.
Dunay bahin sa likod nga bumper niini nga iyang timailhan, gawas sa mga butang sa iyang asawa nga naa sa sulod sa sakyanan.
Matod ni Plania nga si Santillan napriso na niadtong 2018 tungod sa pagkawat sa motorsiklo sa usa ka pulis.
Paglabay og usa ka tuig, nakagawas kini pinaagi sa plea bargaining.
Matod ni Plania nga ilang nautingkay ang record ni Santillan tungod kay ang ilang operation hiniusa tali sa Talamban police ug Highway Patrol Group (HPG) 7.
Si Plania niingon nga giunay usab sa pagkawat ni Santillan ang Toyota Vios sa iyang igsuon nga igbabaligya kaniadto, apan wa mapasakai og kaso kay nabawi ra ang sakyanan.
Matod sa imbestigador nga sumala sa ilang nasayran, drug user si Santillan ug ang pagpangawat og sakyanan maoy paagi sa pagsuporta sa iyang bisyo.
Si Santillan, sa iyang bahin, nanghimakak nga siya ang nangarnap sa sakyanan.
Matod niya nga nikuyog lang siya sa iyang higala nga usa ka Tanny, taga Tejero, Dakbayan sa Sugbo ug gihimo siyang driver sa sakyanan.
Kabahin sa pagplano sa pag-carnap, sigon ni Santillan nga wa siyay kalabutan niini tungod kay igo lang siya nga nagmaneho. Matod niya nga wa na sila magkita ni Tanny human sa insidente
Sa Lunes, pasakaan og kasong carnapping si Santillan, kinsa naa gipriso sa Canduman police station, samtang giandam ang mga dokumento ug ebidensya. / (REV, KFD, GPL)