Sirhan na ang New Normal Oasis for Adaptation and a Home (Noah) complex human sa dul-an sa usa ka tuig nga pagpapuyo og mga pasyente sa coronavirus disease (Covid-19).
Si Cebu City Mayor Edgardo Labella, sa usa ka press conference sa Mayo 14, 2021, niingon nga ang memorandum of agreement (MOA) tali sa Cebu City Government ug Bigfoot Studio matapos sa Mayor 15, 2021.
Bisan kon nihangyo ang Siyudad nga lugwayan kini og tulo ka mga buwan, apan ang management sa Bigfoot nibalibad, nagpasalanat gihapon si Labella sa management tungod sa natabang niini sa pagpapuyo sa mga pasyente.
“Ilang generosity nakatabang gyud sa atong fight sa Covid-19,” matod sa mayor sa iyang press conference sa Mayo 14, 2021.
Apan wa mabalaka si Labella niini tungod kay padayon nagkagamay ang mga kaso sa Coviid-19 sa dakbayan.
Gani, tulo na lang ka barangay isolation centers (BIC) ang pabiling bukas karon.
WA NA MANAWAT
Si Noah manager Jocelyn Pesquera niingon nga sukad sa Mayo 5, ang Noah wa na manawat og mga pasyente nga dunay Covid-19.
Bisan tuod kon ang MOA matapos sa Mayo 15, si Pesquera niingon nga opisyal nga sirhan ang Noah complex ug ibalik ngadto sa Bigfoot Studoio management sa Mayo 30.
Nipahibawo si Pesquera nga manawat pa sila og mga babayeng mabdos nga manganakay hangtod sa Mayo 18.
Opisyal nga gibuksan ang Noah complex sa mga pasyente sa Mayo 28, 2020.
Si Labella niingon nga dunay dapit sa likod sa complex nga expansion sa isolation facility nga padayong gitukod.
Si Pesquera niingon nga kon mahuman na ang pasilidad, makapasulod kini og 1,000 ka mga pasyente.
Sa Mayo 13, 2021, ang Siyudad sa Sugbo dunay 38 ka bag-ong mga kaso sa Covid-19, nga nihatod sa aktibong kaso ngadto sa 569. (REV, JJL)