Matod sa Department of Health (DOH) 7 sa Biyernes, Mayo 14, 2021, moabot na og 6,861 ka mga kawani nga naglangkob sa healthcare workers, senior citizens, ug niadtong dunay comorbidities ang nabakunahan batok sa Covid-19 vaccine ubos sa Project Balik Buhay (PBB) vaccination initiative.
Si PBB chairman for the private sector Edmun Liu niingon nga mokabat sa 114, 971 ka kinatibuk-ang mga kawani gikan sa 1,921 sa mga kompaniya sa Cebu ang nagparehistro alang sa PBB initiated vaccination initiatives.
Kining mao nga mga kawani nahisakop sa vaccination priority groups A1 to C kun healthcare workers, senior citizens, individuals with comorbidities ug essential workers, uban pa.
Si Liu nihatag ani nga report atol sa overall assessment sa pagpadangat sa Visayas Vaccination Manuals sa Kabisay-an sa Sabado, Mayo 15.
Si Frances Dominique Alfafara, PBB volunteer, niingon nga ang matag kompaniya giawhag sa pagduso og statement of management responsibility nga naglatid nga ang tanang rehistradong mga kawani nihatag og pagtugot nga mabakunahan ug nga sila di rehistrado sa laing vaccination programs.
Matod niya nga ang rehistrasyon sa PBB vaccination natapos niadtong Abril 30; hinuon, nanawat pa sila og revisions o bag-ong mga kawani ubos sa kondisyon nga nalakip sila sa karon nga database sa rehistradong mga kompaniya.
Si Alfafara niingon nga ang nagpabakuna sa pribadong sektor “very positive” kay nidagsang ang mga kompaniya nga nagparehistro.
Dugang ni Alfafara nga sa pagkakaron sila nag-review sa registration aron pagseguro nga way mabiyaan nga kompaniya nga nagparehistro sa wa pa ang deadline.
Gawas niiini, way labot sa local government unit partners, dul-an sa 20 ka pribadong mga institusyon sa Sugbo nitanyag og dugang mga lugar nga himuong vaccination sites.
Niini, pito ang activated nga mao ang Chong Hua Hospital-Mandaue City, University of Cebu Medical Center, Mendero Medical Center, Allegiant Regional Care Hospital in Lapu Lapu, Cebu Doctors’ University Hospital, ug Visayas Community Medical Center. (WBS)