Patay nang miabot sa ospital ang 20 anyos nga lalakeng nagmotorsiklo human malatayi sa Ceres bus sa Biyernes sa alas 3:40 sa hapon, Mayo 14, 2021 sa Barangay Bagatayam, lungsod sa Sogod, amihanang Sugbo.
Giila ni Police Lieutenant Warlito C. Tuñacao, hepe sa Sogod police station, ang biktima nga si Chan Fretch T. Flores, 20, ulitawo, nagpuyo sa nahisgutang dapit.
Ang nakaligis kaniya mao ang Ceres bus (063010) nga gimaneho ni Joel Balunan, 30, taga sityo Guinarapan, Barangay Bagay, lungsod sa Daanbantayan, amihanang Sugbo.
Si Flores way driver’s license.
Matod ni Tuñacao nga sa ilang pasiunang imbestigasyon, ang Ceres bus gikan sa Dakbayan sa Sugbo padung sa Hagnaya, San Remegio samtang si Flores gikan sa Barangay Tabunok padung mopauli.
Nagsunod si Flores sa laing sakyanan ug buot untang mo-overtake bisan kon likuonon ang karsada.
Sa pagkurbada ni Flores, nawad-an siya og kontrol sa motorsiklo hinungdan sa pagkatumba niini.
Siya nalagpot sa pikas lane diin nagsubay ang bus hinungdan nga siya naligsan.
Gidala pa si Flores sa Sogod District Hospital, apan patay na siyang niabot, matod sadoktor nga nag-atiman.
Si Balunan nitahan ngadto kang Damolog Barangay Kapitan Gaspar Monisit nga maoy nitugyan kaniya sa kapulisan.
Si Balunan gitanggong sa Sogod Police Station samtang gihuwat pa ang kabanay kon pasakaan ba siya og kaso.
Kasong reckless imprudence resulting to homicide ang atubangon ni Balunan kon mopasaka og kaso ang pamilya sa batan-on. (GPL)