Ang kinabuhi matandi nimo sa usa ka biyahe, moagi ka og mga lisod ug libaong nga mga dalan sa dili pa moabot sa imong destinasyon. Ug kon maabot na ka, lami kaayo sa pamati kay bisan sa mga bati nga dalan nga naagian, nakaabot gyud kas imong padulngan.
Sa kinabuhi, mahinungdanon nga duna kay diskarte ug kompiyansa sa kaugalingon. Inubanan sa kugi, pag-ampo sa Ginuo, ug tabang sa uban, mahimo nga reyalidad ang kanhi imong lang gipangandoy o gidamgo.
Sama kini sa sugilanon ni Atty. Michelle Cabigas Amistad-Zozobrado. Ang anak og kanhi pulis ug cook, puno sa diskarte sa kaugalingon ug usa kini sa mga yawe nga iyang nakab-ot ang kalamposan.
Daghan siya og mga kalisod nga naagian, apan wa kini makababag niya.
Niadtong Abril 9, 2021, gibuksan ni Atty. Zozobrado ang usa sa mga bunga sa iyang paningkamot, ang makabaton og kaugalingong law office. Naa kini nahimutang sa Brgy. Poblacion III, siyudad sa Carcar.
Matawag siya nga eskolar ng bayan kay sukad sa iyang pagtungha sa high school hangtod sa iyang pagtapos sa law school, eskolar siya.
Congressional scholar siya ni Kong. Eduardo Gullas sa 1st district diin libre siya nag-eskwela sa Gullas Law School sa University of the Visayas ug na-conferred isip juris doctor.
Eskolar usab siya sa kolehiyo sa University of the Philippines-Cebu sa kursong Political Science.
Sa high school, academic scholar siya ni anhing Cardinal Vidal ug sa Dominican Sisters sa St. Catherine’s College sa Carcar, diin siya ni-graduate nga 3rd honor.
Samtang sa Carcar Central Elementary School siya nigradwar isip salutatorian.
“Tanan akong gieskwelahan, libre gyud siya. I would call myself scholar ng bayan kay money gyud to siya sa mga tawo...” matod ni Atty. Zozobrado. “I know man gyud my parents could not really support me financially to finish my education.”
“So, naa sa akong mind if ever dili ko modiskarte, mangita og way that I could help my self graduate and achieve my goal, kay akong goal man gyud since from preschool is really to become a lawyer. I know very costly ang course.”
Naanad na siya sa iyang pagkabata nga kon naay mga retaso sa factory sa iyang lola, naghimo siya og mga wallet o mga tsinelas. Ug iya kining gipamaligya sa iyang classmates ug nana siyay bawon ug gastuon sa pagpalit og school supplies.
Matod ni Atty. Zozobrado, kanunay siya nag-advance og tuon ug basa og mga libro. Niadtong nagtungha pa siya sa elementary, mga libro na sa high school iyang gipangbasa. Pag high school niya, mga libro na sa college iyang gipangbasa.
“I need to excel so that a lot of people would be willing to help me, to provide for my education,” matod sa 36 anyos nga manlalaban.
Apil sa nagtabang niya sila si kanhi mayor ug karon Konsehal Patrick Barcenas ug kanhi bise mayor Roger Montesclaros nga naghatag niyag allowances ug kwarta para palit og mga libro sa pagtungha.
Dihay mga higayon sa iyang pag-eskwela sa kolehiyo sa UP Cebu, iyang giutang ang iyang pleti sa mga mini bus gikan sa siyudad sa Carcar paingon sa dakbayan sa Sugbo aron makaeskwela lang.
“Inig abot sa eskwelahan, lain na sad ang hunahunaon og asa kag ikaon. Naa ra man say classmates nga maluoy nga mopakaon sad og apil,” dugang saysay niini.
Pagdasig niya sa mga batan-on nga padayon nga mangandoy inubanan sa lihok ug kugi aron mahatagan og katumanan.
“Continue to create dreams, anyway dreams are always free. They must remember, we must realize our dreams while wide awake and not just sleep upon. Dili pwede magsige og damgo, walay paglihok.” (SCG)