Di na mahago puhon ang mga Kanangahanon kon dunay tuyo sa mga opisina sa municipal hall sa Kananga, Leyte.
Kay niadtong Lunes, Mayo 10, 2021, gipahigayon ang groundbreaking ceremony sa P414 milyunes nga bag-ong Kananga municipal hall sa Brgy. Libongao.
Matod ni Mayor Matt Torres nga dugay na niyang damgo nga magtukod og bag-ong municipal hall kay sa pagka-karon, buwag buwag ang mga opisina sa munisipyo ug mahago ang mga tawo kon dunay mga tuyo sa opisina.
Gusto sa mayor nga ma usa na sa usa ka building ang mga opisina aron dili na mahago pagtabok tabok ang mga tawo.
Tulo ka andana ang bag-o nga municipal hall ug nahimutang sa unom ka hektarya nga yuta nga napalit sa LGU.
Naa sa atbang ang commercial area.
Sugdan usab ang pagtrabaho sa 2.42 kilometros nga access road gikan sa San Vicente hantud Libongao nga gipundohan ni Kongresista Lucy Torres Gomez.
Sa palibot sa bag-ong municipal hall naa ang bag-ong Rural Health Unit ug duna say plaza ug lapad nga parking area.
Sa katapusan ning tuiga, makita na ang bag-ong municipal hall.
Gipaniguro usab karon ni Torres nga mamahimong siyudad ang Kananga nga maoy gitinguha sa iyang liderato.
Sa pagkakaron, ang Kananga usa ka first class nga lungsod sa lalawigan sa Leyte. (JKDP)