Nalipay ko nga nidesisyon ang piskaliya nga i-dismiss ang mga kihang gisang-at batok sa pito nga gipangdakop tungod sa reklamo sa kapulisan nga kidnapping, ug uban pa gikan sa Bakwit School nga gihulagway nga NPA Training School.
Gibarugan sa piskaliya ang kamatuoran. Palpak ang kapulisan nga nag-imbento sa istorya nga kuno ang mga batan-ong Lumad gidagit ug gibansay sa pagka rebelde sa usa ka NPA Training Camp. Diin gipahigayon ang raid, diha sa usa ka retreat house sa SVD sa USC-TC.
Ambot lang sab niining atong mga police beat reporter nga wala dayon motaho sa kamatuoran kay sukwahi sa gipasiatab sa kapulisan. Mahimo mang ihulagway mismo ang retreat house ug mang-interbyu sa mga sikyo nga duna bay pagbansay sa pagka rebelde nga nahitabo.
Ang rason sa mga reporter, kay dili kuno makontak ang kaparian sa SVD ug alas says pa kuno ang press conference aron makuha ang ilang bahin sa istorya.
Wa na ko makahibawo og unsay lakang sa media leaders niining “he said, she said” nga klase sa reporting dinhi sa Sugbo.
Apan gidungagan sa kapulisan ang ilang palpak nga handling sa media. Gipa-cover dayon sa pagbuhi sa pito ang tanang sakop sa media gawas sa reporter sa Rappler nga si Lorraine Ecarma.
Unsay rason? Kay kunohay ang Rappler fake news. Maayo na lang kay nitabang kaniya si Lt. Col. Maria Aurora Rayos, Central Visayas police public information chief, aron makabuhat sa iyang trabaho.
Ambot nganong nahanggaw kining atong kapulisan dinhi sa Sugbo. Kadtong ilang pagronda sa USC-TC ilang gipaguwa nga rescue ang ilang operasyon nga klarong pangilad.
Pero daw ang ilang gusto mao kadtong mga reporter nga igo lang mosibya sa ilang gustong ipaguwa. Ilang gilisod-lisod ang Rappler kay di mosanong dayon?
REKLAMO?
Matod pa Presidente Rodrigo Duterte, ang oposisyon sa nasud igo lang kuno moreklamo. Wa nay laing gibuhat. Mao niy depensa sa best president in the solar system sa kapalpak sa iyang pagdumala sa kampanya batok sa Covid-19?
Kanus-a pa kaha kita makakab-ot og herd immunity sa kakulang ug kahinay sa atong pamakuna karon? Di motumaw ang mga community pantry kon gitarong pa sa administrasyon ang igong kantidad ug pag-apod-apod sa ayuda. Unya, ipapriso ang di magtarong og sul-ob sa face mask? Di mo makamao sa saktong information drive nga motuo ang katawhan?
Mr. President, tarunga ang inyong trabaho ug mahunong lagi dayon ang mga reklamo. (DM @anol_cebu)