Ang Mayo maoy pinakadaghan og pista dinhi sa nasud. Sa lalawigan lang sa Bohol, maghilak ang adlaw kon walay pista. Kon imong sundon o naa kay kalendaryo sa pista didto, dili ka mapasmo kay kada adlaw naay kumbira. Sama gahapon, Mayo 15, puwerting daghanang nagpista. San Isidro Labrador nga adlaw gahapon. Gipahunong ra ba ni Presidente Rodrigo Duterte ang pagpahigayon og pista aron kalikayan ang tinakdanay sa Covid 19.
Nahibawo naman mo aning pista nga ‘eat all you can’ man. Pero bisan pista, naa sab tay sundon nga lagda aron dili ta tanto mauwawan sa mga tagbalay nga atong sak-an. Credit goes to the original writer kay ako ra pod ning gikopya sa social media.
1) Kon giimbitar ra gani ka, ayaw pagdala og laing tawo kay dili man na networking imong adtuan. Aw, puwede man pero pananghid sa imong adtoan nga magdala ka og kauban kay basin igo-igo ra pod ang ilang preparasyon. 2) Kanang lumpiya, limit ra gyud na sa duha o tulo ka buok imong kan-on. Ayaw na limaa kay dili baya na lalim preparahon kay puston pa na og maayo.
3) Kanang salad sa mga VIP ra gyud na. Sa mga paryente nga gikan sa laing lugar labi pa tong dili kaayo makakaon ana. 4) Bisan kanunay kang makakaon og pansit ug bihon, tilawi pod ang ilang andam aron dili maka-ingon ang tag-balay nga imong giyam-iran ang ilang pansit. 5) Kon pasak-on na gani mo sa tag-balay kay kaon na, ayaw mo pagtulod-tulod kinsay mouna kay maunhan unya mo sa uban nga gigutom na.
6) Sa dili pa mo mosaka o mosulod sa balay, pangayo pod mo og katahuran o respito sa tag-balay. ‘Maayong udto o gabii ug maayong pista ninyo.’ 7) Unya mokuha lang sa igong kan-on ug sud-an nga isulod sa plato. Dili daghanon og kuha kay dili unya nimo mahurot, malabay lang o puston ba kaha ninyo. 8) Unya padungog-dungog sab mo sa tagbalay nga lami pagkaluto ilang sud-an. Ayaw mo panaway kon unsang sud-an ang ilang gi-andam bisan kuwang sa timpla. 9) Human ninyo og kaon, pahuway o estar sab mo og pipila ka minutos una mobiya. Unya maghuwat og naay ipadala nga bring house, dili mag-una-una og pamutos. Happy fiesta sa tanan! (bobbygnalzaro@gmail.com)