Mobalik na usab pagpamakuna ang Kagamhanan sa Dakbayan sa Lapu-Lapu sa mga senior citizen ug persons with comorbidities karong Lunes, Mayo 17, 2021.
Kini human nga nakadawat na usab ang kagamhanan og 7,600 ka doses sa bakuna nga AstraZeneca gikan sa Department of Health DOH-7.
Matod ni Mae Cherryl Tepait, immunization coordinator sa City Health Office sa dakbayan, nga ang maong gidaghanon sa bakuna itagana isip first dose.
Aduna silay laing 1,700 ka dose sa bakuna nga alang sa second dose sa mga nabakunahan niadtong unang semana sa Mayo apan adto na iturok sa Hunyo.
Gihunong una sa kagamhanan ang pagpamakuna sa mga senior citizen niadtong Lunes, Mayo 10, human nahurot ra usab dayon ang 1,000 ka bakuna nga gihatag sa DOH.
Gani wala lang una sila manawat og laing maturokan gawas sa mga senior citizen gumikan sa kagamay nga alokasyon sa bakuna nga nadawat.
“Karong Monday May 17 pwedi na ta sa comorbidities,” matod ni Tepait.
Samtang gibutyag ni Tepait nga 2,044 na sa kinatibuk-ang 2,696 ka mga medical frontliner ang nabakunahan sa kagamhanan.
Naa na sab 89 sa 2,044 ang nakadawat na sa ilang second dose.
AstraZeneca ug Sinovac ang gigamit nila nga mga bakuna, sumala pa ni Tepait.
Moabot na usab sa 1,820 ka mga senior citizen ang nabakunahan ug 329 ka mga person with comorbidities.
Wala pa usay nakadawat og second dose kanila.
“Mag wait pata ug 28 days nila. Katong April 8 naka turok ta ug 90 so mao to second dose nila pag May 6 pero naay usa nga ni-refuse,” matod ni Tepait.