Mas minos ang mga kaso sa dengue karong tuiga sa dakbayan sa Sugbo itandi sa samang mga buwan sa miaging tuig.
Ang Cebu City Health Department (CHD) nakatala lang og 35 ka mga kaso sa dengue gikan Enero hangtod sa Mayo ning tuiga.
Mas ubos kini sa natala sa Enero hangtod Mayo sa miaging tuig nga 554 ka mga kaso.
Sa datos nga nahatag ni CHD officer-in-charge Jeffrey Ibones, 16 ka mga kaso sa dengue ang natala niadtong Enero ning tuiga; duha sa Pebrero; 10 sa Marso; lima sa Abril; ug duha pa sa Mayo.
Kay wa pa man mahuman ang Mayo, matod ni Ibones nga basin aduna pa’y posibilidad nga mas mosaka pa kini.
Sa laing bahin, sa Enero sa 2020, 300 ang natala sa Enero; 211 sa Pebrero; 24 sa Marso; 10 sa Abril; ug siyam sa Mayo.
Ang CHD nakatala og 1,081 ka total nga kaso sa dengue sa 2020, 14 niini nangamatay.
Kon itandi sab sa 2019, mas ubos ang 2020 tungod kay naabot og 2,930 ang total nga kaso sa dengue niadtong 2019.
Matod ni Ibones nga nakatabang ang pag “stay at home” sa mga tawo tungod sa pandemya sa pagkunhod sa mga kaso sa dengue. Matod ni Ibones nga mas naay oras na ang publiko nga makapanglimpyo sa palibot sa ilang mga balay.
Nakatabang sab sa pagkunhod ang wa pa pagbalik sa face-to-face classes tungod kay kasagaran sa mga makakuha og dengue kay mga bata.
Gipahinumduman ni Ibones ang publiko nga magmabinantayon sa sud ug gawas sa ilang mga balay ug isiguro nga way napundo nga tubig nga pwede kapuy-an sa mga lamok. (JJL)