SUPERBALITA CEBU

10 ka mga balay naugdaw sa sunog

Nangaugdaw ang 10 ka mga balay sa Sitio Pilit, Barangay Cabancalan, Mandaue City, utlanan sa Barangay Talamban, Cebu City human nasunog alas 6:11 sa buntag sa Sabado, Mayo 15, 2021.

Si SFO1 Antonio Montajes, imbestigador sa Mandaue City Fire Station, miingon nga ilang nadawat ang alarma pinaagi sa Cebu City Command Center tungod kay didto na-report.

Gawas sa Mandaue City Fire Station, miresponde sab sa lugar ang Cebu City Fire Station.

Gisaka sa commander-in-chief ang sunog ngadto sa second alarm alas 6:18 sa buntag.

Sa padayong pagkumbati sa kabumberohan, alas 6:40 sa buntag nakontrolar na nila ang kayo ug human sa walo ka minutos nga overhauling, gideklara kini nga hingpit ngaa napawong, sigon ni Montajes.

Matod ni Montajes nga nagsugod ang sunog sa balay ni Ryan Desmaparado.

Giangkon sa mga residente ug ni Desmaparado nga nagsugod ang sunog human gituohang ni-spark ang ilang minifan nga gi-charge samtang nangatulog sila, sigon ni Montajes.

Daling nidako ang kayo sa ilang balay tungod kay gama lang kini sa light materials.

Giklaro ni Montajes nga di pa sila makasigurado kon ang gisulti sa mga lumolupyo mao ba ang hinungdan kay nagpadayon pa ang ilang imbestigasyon.

Gani magkuha pa sila og mga sample nga wirings ug abo sa lugar aron masuta kon unsay tinuod nga hinungdan sa sunog.

Giimbetar sab ni Montajes si Desamparado ug ang iyang asawa sa ilang estasyon alang sa “questioning”.

Nikabat ang danyos sa sunog ngadto sa P300,000.

Matod niya nga ang mga balay gilangkuban sa tag duha ka andana ug bungalow nga mixed ang materyales.

Sigon ni Montajes nga giatiman na sa mga opisyales sa Barangay Talamban ang mga residente.

Matod ni Montajes nga kon maghisgot sa dapit, anaa kini sulod sa hurisdiksyon sa dakbayan sa Mandaue apan sa estorya sa mga residente, narehistro sila sa Barangay Talamban.

Sa usa ka text message sab nga nadawat sa Superbalita Cebu ni Dr. Maricel Yu, pangu sa Mandaue City Social Welfare and Services, miingon siya nga ang lugar nga nasunogan di na parte sa dakbayan sa Mandaue base sa ilang nadawat nga taho. (KFD)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph