DIGOS CITY -- Nagpasidaan ang Digos City Police Station (DCPS) ngadto sa publiko nga hugtanon nang ipatuman ang "No Smoking Ordinance" human nga daw gibalewala kini sa ubang manigarilyohay.
Gibutyag ni Lieutenant Colonel Vici Anthony Tababa, hepe sa DCPS, nga gipasidan-an ang tanang mahilig sa yosi nga dili na mahimong mohithit niini sa mga pampublikong lugar.
Namatikdan sa mga tigpaniid nga bisan ang ubang drayber og traysikel mohithit gihapon og sigarilyo panahon sa ilang pagpamaneho.
Apan giklaro ni Tababa nga sugod niadtong Biyernes, Mayo 14, isyohan na og citation tickets ang tanang masakpan nga molapas sa balaod aron makamulta.
Gitahasan sab niini ang iyang mga ginsakpan nga dakpon ang nanigarilyo sa mga lugar nga daghang tawo ug mga establisemento.
Aduna na'y 14 ka indibiduwal ang nasampolan sa kapulisan human nga wa nituman sa maong balaod.
Ang Smoking Ordinance 93-16 hugot nga nagdili sa pagpanigarilyo sa publikong lugar aron di madamay ang panglawas sa mga tawong wa nagbisyo niini.
Gidason sa opisyal nga gawas nga gasto ang maong bisyo, makahatag sab kini og kadaut sa panglawas sa matag tawo ug sa kinaiyahan sanglit makadugang sa polusyon ang aso sa sigarilyo. (Orlando B. Dinoy)