GIBAHA ang mga ubos nga dapit sa probinsiya sa North Cotabato ug Maguindanao.
Nunot kini sa walay puas nga kusog nga pag-ulan pinisik sa Bagyong Crising.
Grabeng naapektuhan sa baha ang Pikit sa North Cotabato gumikan sa pag-awas sa mga kasapaan.
Natigayon sab ang pagdahili sa yuta sa Barangay Greenhills, President Roxas sa maong probinsiya kilid sa kalsada.
Mitaas ang lebel sa tubig sa Pulangi River hinungdan nga gibaha sab ang ubang lungsod sa nahisgutang probinsiya.
Gawas sa NorCot, gibaha sab ang mga lungsod sa Maguindanao sa pag-awas sa tubig-baha sa Rio Grande de Mindanao ug Liguasan Marsh.
Gibantayan karon ang bul-og sa baha gikan sa Bukidnon ug Agusan River nga moigo sa North Cotabato lakip na sa Maguindanao.
Nagpasidaan ang mga opisyal sa Cotabato Provincial Disaster Risk Reduction and Management Council sa mga namuyo kilid sa kasapaan ug kabukiran nga mag-amping sa bul-og sa baha ug mga landslide. (Edgar E. Fuerzas)