SUPERBALITA DAVAO

Border way pasaylo; di kalusot

DAVAO. Makita ang hugot nga inspeksiyon sa border control sa Marilog District, Siyudad sa Davao. (Hulagway ni Regine Lanuza sa PTV-4 Davao)

MOKABAT na sa 35 ka mga private vehicles ug unom ka motorsiklo ang gipabalik sa ilang gigikanan sa Northern Mindanao gumikan wala kini nakapakita og negatibo nga resulta sa real-time reverse transcription polymerase chain reaction (RT-PCR) test ug di sab essential ang ilang biyahe pasulod sa Davao City sa border niini sa Marilog District.

Gikan alas 2 sa hapon Dominggo, Mayo 16, 2021, sukad niadtong Mayo 14, mao nay natala nga ihap human sa executive order nga nagsagop sa Joint Regional Interagency Task Force for the Management of Emerging Infectious Diseases-Regional Task Force Against Covid-19 (RIATF-RTF) 11 Resolution No. 01 series of 2021 sa Dakbayan sa Davao.

Sumala ni Major Arquimedes Crosby Wesley, ang deputy sa City Mobile Force Company sa Davao City Police Office (DCPO), kinsa team leader sa Lumondao Quarantine Checkpoint, wala gayod nila pasayloa ang mga walay negative RT-PCR test results sa Covid-19 ug ilaha kining gipabalik nga sagad gikan sa Northern Mindanao.

"As of 6 a.m. today (Sunday), 35 private vehicles and 6 motorcycles coming from other regions were denied to entry in Davao City, and in fact, nag-advise kami to return sa kanila point of origin due to wala silang negative RT-PCR test results and hindi rin essential ang travel nila," sulti ni Major Wesley nga nahinabi sa Superbalita Dominggo.

Ang Marilog District maoy nahimong border control sa utlanan sa Davao City ngadto sa Northern Mindanao nga maoy potensiyal nga agianan sa paglusot ngadto sa Cagayan de Oro City konektar sa Visayas Region.

"Mas gipahugtan gyod sa kapulisan sa Davao City Police Office ang pagbantay sa Lumondao Marilog Quarantine Checkpoint, tanan nga papeles sa biyahero ginapangita, kung dunay usa kulang labi na ang negative RT-PCR test results, pabalikon gyod nato sila, labi na kung dili essential ang biyahe," sulti ni DCPO spokesperson Captain Rosario Aguilar sa laing pakighinabi sa SuperBalita Dominggo.

Tungod niini, hugot ang seguridad sa Marilog checkpoint ug istrikto ang pagpatuman sa pagpangita sa mga papeles sa pagbiyahe subay sa Resolution No. 1 sa RIATF-RTF.

Kahinumdoman nga sugod Mayo 14, 2021, alas 12:01 sa tungang gabii, mga turista, o kinsa mang buot mosud sa Davao Region, moduaw sa Davao City pinaagi sa land travel, mo-presenta na sa ilang negative results RT-PCR tests una sila tugutan nga makasud sa checkpoint sa Marilog District.

Sa pagguwa sa resolusyon niadtong Mayo 3 nga naghiusa sa managsama nga giya sa pag-regulate sa entry ug exit sa regional borders sa rehiyon, gilayon mipatuman og giya ang matag local government units sa Davao Region.

Subay sa resolusyon, mga turista ug returning residents nga non-authorized persons outside residence nga mosud sa Davao Region mopakita na sa negative RT-PCR test result.

Samtang ang mga returning residents sa rehiyon nga non-Apor angay sab nga mokuha og RT-PCR test results nga may identification card (ID) nga mopakita sa ilang address o ubang proof of residence.

Mga essential travel sa non-residents sa rehiyon nga may kalabutan sa access sa essential goods and services, medical consultations ug uban pa, tugutan nga makasud basta mopresenta sila og proof of appointment; medical prescription/referral; o bisan unsang dokumento nga mopatuod nga essential ang ilang transaksiyon.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph