Nahimong emosyonal ang paghandom kang anhing Kobe Bryant sa pag-enshrine niini sa Naismith Basketball Hall of Fame didto sa Mohegan Sun Arena sa Uncasville, Connecticut kagahapon, Mayo 16, 2021 (PH time).
Ang 5-time NBA champion way duda nga malakip sa Hall of Fame tungod sa grabeng nabuhat niini sa basketball. Subo lamang kay wa na kini makaabot sa iyang pagsulod sa HOF kay mitaliwan man kini human ang makakurat nga helicopter accident niadtong 2020.
Lakip sa nasulod sa HOF Class 2020 mao ang bigmen nga si Tim Duncan ug Kevin Garnett nga maoy kasabayan ni Bryant sa NBA.
Apil pud sa HOF Class mao sila NCAA champion coach Kim Mulkey, two-time NBA champion coach Rudy Tomjanovich, four-time Olympic gold medalist Tamika Catchings, three-time Final Four coach Eddie Sutton, 1,000-game winner Barbara Stevens ug si FIBA secretary general Patrick Baumann.
Ang asawa ni Bryant nga si Vanessa mao ang mi-istorya enshrinement ceremony. Ang presenter sa seremonya mao ang NBA legend nga si Michael Jordan nga mao pud ang usa sa idolo ni Bryant.
Midugang sa emosyon mao ang crowd nga misinggit: “Kobe! Kobe! Kobe!”
“You did it. You’re in the Hall of Fame now. You’re a true champ. You’re not just an MVP, you are an all-time great. I’m so proud of you. I love you forever and always,” matod ni Vanessa sa iyang speech.
Si Bryant miduwa’g 20 ka tuig ubos lang sa usa ka team—Ang Los Angeles Lakers. Mihatag kini og lima ka titulo sa Lakers niadtong tuig 2000, 2001, 2002, 2009, 2010.
Si Kobe nahimo pud nga two-time Finals MVP, 4-time All-Star Game MVP, 1-time NBA Season MVP, 18-time NBA All-Star, 1-time Slam Dunk King, 2-Time NBA scoring champion, 2-Time Olympic gold medalist, 11-time All NBA first time ug 9-time NBA defensive first team.
Miretiro si Bryant sa NBA sa tuig 2016. Sa iyang last game sa Lakers mipuntos kini’g 60 batok sa Utah Jazz aron aswaton ang iyang team sa 101-96 nga kadaogan.
Niadtong Enero 26, 2020, nahitabo ang helicopter crash diin namatay si Bryant, iyang 13-anyos nga anak gna si Gianna ug laing pito ka pasahero. Padulong unta sila Bryant sa usa ka basketball camp sa California. (RSC)