GIPANGULOHAN ni Lebron James ang Los Angeles Lakers batok Indiana Pacers, 122-115, sa iyang pagbalik sa NBA kagahapon, Mayo 16 (PH time).
Mipupo’g 24 puntos si Lebron James samtang mitali’g 28 puntos ang big man nga si Anthony Davis aron dalhon sa kadaogan ang Lakers.
Si James wala sa uwahing unom ka duwa sa Los Angeles tungod sa iyang high ankle sprain, samtang si Davis wa pud makaduwa batok sa Houston niadtong Huwebes tungod sa tight left thigh.
Sa iyang pagbalik, nakapasulod si James sa 11 sa iyang 22 ka itsa sa 28 minutos nga playing time. Nakakuha pud siya’g walo ka assists ug pito ka rebounds.
Si Andre Drummond milabni’g 15 rebounds samtang mikuhag 10 rebounds si Davis alang sa Lakers. Si Caris LeVert maoy highest-pointer sa Indiana nga adunay 28.
SUNS 140, SPURS 103
Gisunog sa naglagiti nga opensa sa Phoenix Suns ang San Antonio Spurs, 140-103. Si Devin Booker mikamada og 27 puntos alang sa Phoenix.
Ang Phoenix nauwahi nalang og usa ka duwa sa Utah Jazz alang sa No. 1 spot sa Western Conference.
Si Keldon Johnson miiskor og 18 puntos sa San Antonio nga miduwa nga wala si head coach Gregg Popovich, kinsa mi-leave og usa ka duwa aron mosalmot sa Hall of Fame induction ceremony ni Tim Duncan.
NETS 105, BULLS 91
Giihaw sa Brooklyn ang Chicago Bulls, 105-91, sa unang higayon sulod sa tulo ka buwan nga nag-abot ang Big Three sa Nets nga si Kevin Durant, James Harden ug Kyrie Irving.
Si Irving mitalig og 22 puntos, midugang og 12 puntos, siyam ka rebounds ug unom ka assists si Durant, samtang si Harden miamot og singko puntos, lima ka rebounds ug pito ka assists.
Si Patrick Williams nakahimo’g 24 puntos alang sa Bulls.
BUCKS 122, HEAT 108
Si Khris Middleton ug Bryn Forbes mi-combine og 42 puntos aron aswaton ang Milwaukee Bucks batok Miami Heat, 122, 108. Miamot og 20 puntos ug 10 ka assists si Jrue Holiday alang sa Bucks nga anaa karon sa ikatulo nga pwesto sa Eastern Conference.
Si Kendrick Nunn mihimo og season-high 31 puntos alang sa Heat. Ang leading scorer sa Miami nga si Jimmy Butler wa makaduwa tungod sa lower back tightness. (RSC)