Niadtong Huwebes (Biyernes dinhi sa ato), ang Centers for Disease Control and Prevention (CDC) sa Estados Unidos mipahibawo nga kadtong mga tawo nga kompleto na sa bakuna batok sa Covid-19 di na kinahanglan nga magsul-ob og face mask ug mag-social distancing indoors ug outdoors.
Si Dr. Rochelle Walensky, direktor sa CDC, miingon, “We have all longed for this moment when we can get back to some sense of normalcy.” Di pa gyud normal, pero morag normal na. Kay mag-mask gihapon sakay sa bus, train ug eroplano.
Kini tungod kay miabot na sa 117 milyones ka mga tawo sa Estados Unidos ang hingpit na nga nabakunahan batok sa Covid-19. Nikunhod na ang natakdan sa maong balatian ug ang mga pagtuon didto sa US ug Israel nagpakita nga epektibo ang bakuna.
* **
Mahitabo kaha kini dinhi sa ato? Ang pagtangtang sa rikisito nga magsul-ob og face mask kon kompleto na sa bakuna, dako kaayo nga insentibo sa mga tawo nga magpabakuna sila, ilabi niadtong nagdiki-diki ug nagduha-duha nga magpabakuna.
Gani, dunay sugyot ang Department of Trade and Industry (DTI) ug sa pribadong sektor nga hatagan og “vaccine passes” kadtong nakompleto na sa ilang bakuna aron makasud sa indoor establishments.
Apan supak niini ang Department of Health (DOH). Si Health Undersecretary Maria Rosario Vergeire niingon nga wa pay igong ebidensiya nga ang tawo nga nakahuman na sa duha ka doses sa bakuna, di na masakit ug di na manakod pa.
* **
Matod ni Vergeire, ang pasiunang mga pagtuon nagpakita nga ang bakuna nga gigamit dinhi sa Pilipinas di pa makapugong sa pagpanakod, apan makapaminos sa grabeng sakit ug pagkaospital.
Mao kini nga bisan kon ang usa ka tawo kompleto na sa bakuna, ipadayon gihapon ang minimum health protocols sama sa pagsul-ob og face mask ug social distancing. Amping lang gihapon.
Ang Cebu City Council, sa usa ka resolusyon, niawhag sa grocery tores ug uban pa nga mohatag og discount sa kompleto na sa bakuna aron madasig ang mga tawo nga magpabakuna.