Usa ka lalake mihulga sa iyang kanhi uyab nga ipakatap ang law-ay nga hulagway ug video kon di makig-sex kaniya, apan nadakpan sa kapulisan niadtong Sabado, Mayo 15, 2021.
Giila sa kapulisan ang suspek nga si Chadlie ‘Chad’ Bual, 39, minyo.
Ang suspek nasikop sa Rela Jarse, Foodhouse and Coffee Shop sa Barangay Poblacion, Hinunangan, Southern Leyte.
Ang pagkasikop sa suspek resulta sa reklamo nga gipasaka sa kanhi uyab niini ngadto sa Women and Children Protection Desk (WCPD).
Matod sa 21 anyos nga biktima, nga usa ka college student, daghan na siya og nadawat nga hulga gikan sa suspek nga ipakatap ang iyang hubo nga hulagway ug bidyo kon di siya makig-sex niini.
Gikondisyonan usab sa suspek ang biktima nga mangayo og P21,000 para di gyod ipakatap ang hulagway ug bidyo.
Human sa pagsumbong sa biktima, niuyon kunohay kini sa suspek nga mohatag og P21,000 ug mag-abot sa coffee shop.
Apan way kalibutan ang suspek nga gipalibotan na diay siya sa mga pulis sa Anti-Cybercrime Unit atol sa ilang pag-atubang.
Sa dihang gidawat sa suspek ang salapi, gideklara na sa kapulisan ang pagsikop kaniya ug wa na kini mopalag.
Naa na karon sa kustodiya sa kapulisan sa Hinundayan, Southern Leyte ang suspek ug nag-atubang og daghang kaso.
Giatubang niini ang kalapasan sa Republic Act (RA) 9995 o Anti-Photo and Video Voyeurism Act, RA 9262 o Violence Against Women and Children, Robbery Extortion ug Grave Threat.
“As part of our Internal Cleanliness Policy (ICP), we are strengthening our war against cybercriminals as we upgraded our equipage in the furtherance of our existing programs,” matod ni PNP Chief General Guillermo Eleazar sa Superbalita Cebu
Padayon nga giawhag sa kapulisan ang tanan nga posibleng mabiktima sa samang krimen nga di mahadlok pagsumbong kanila aron masikop kini. (JKDP)