Gihangop sa Vicente Sotto Memorial Medical Center (VSMMC) ang gilusad nga ‘Dugo Mo, Kinabuhi Ko’ mobile blood donation nga gisugdan niadtong Sabado, Mayo 15, 2021 sa Barangay Pit-os, siyudad sa Sugbo.
Ang maong programa gipasiugdahan kini sa Association of Barangay Councils (ABC) sa dakbayan nga gipangunahan sa presidente niini nga si Franklyn Ong.
Gitinguha nila nga makatigom og 1,000 ka bags sa dugo aron idugang sa kakuwangon sa blood supply sa VSMMC.
Matod ni Ong, hangtod pa sa Hunyo mahuman ang mobile blood donation diin ilang gitinguha nga ang tanang 80 ka mga barangay sa siyudad sa Sugbo makasalmot niini.
“Ang atong project is up to June to cover all the barangays,” matod ni Ong sa Superbalita Cebu.
Pasabot niya nga ang Department of Health 7 mipadalag suwat sa ilang buhatan nga suportahan sa mga barangay ang ilang programa nga pagdonar og dugo human nabantayan nga gamay nalang kaayo ang supply sa dugo sa mga tambalanan sa tibuok Central Visayas.
Tungod niini, matod ni Ong, kinahanglan nga maghiusa ang tanang mga opisyal nga suportahan ang programa sa panglawas ning panahon nga nagkuwang na og dugo ang mga publikong tambalanan.
Sumala niya nga karon ang panahon nga abagan ang VSMMC pinaagi sa paghatag sa ilang mga dugo nga libre alang sa mga kabus nga nanginahanglan niini.
Si Dr. Halide Tangarorang, pangulo sa VSMMC blood services unit, mihulagway sa gihimo sa ABC sa siyudad sa Sugbo nga haom kaayo ning panahon sa pandemic tungod kay nagkuwang na gyud silag supply sa dugo.
Dugay na matod pa kini nga problema ug nadugangan pa sa pag-igo sa Covid-19 diin wala na kaayoy modonar sa ilang mga dugo.
Sigon sa ilang datus kapin sa usa ka gatus ka mga pasyente matag adlaw ang nanginahanglan og dugo, apan dili nila kini mahatag tungod sa kakuwang na sa supply.
Tungod sa pandemic, hugot nga gipatuman ang pag-screen sa mga dugo apan nanghinaot ang kadagkoan sa tambalanan nga daghan pa ang mohatag sa ilang dugo aron daghang kinabuhi ang matabangan. (AYB)