Gikondina sa Police Regional Office (PRO) 7 ang pagpamusil sa lima ka mga tawo sa siyudad sa Guihulngan niadtong Biyernes sa buntag, Mayo 14, nga giingong binuhatan sa New People’s Army’s Special Partisan Unit (NPA-SPARU).
Si Police Brigadier General Ronnie Montejo, hepe sa PRO 7, nitahas sa provincial director sa Negros Oriental Police Provincial Office (NOPPO) nga mohimog imbestigasyon ug hatagan og hustisya ang kamatayon sa upat ka mga mag-uuma ug usa ka inahan.
Sa gihimong imbestigasyon sa Guihulngan City Police Station, nasuta nga ang mga biktima gidudahan nga informant sa military ug sa kapulisan.
Unang pagpamusil nahitabo sa alas 5:00 niadtong Biyernes sa buntag sa Sitio Panagtugas, Barangay Trinidad, Guihulngan diin giila ang biktima nga si Rogelio Quirante Fat, 45.
Sayo nga nimata si Fat aron manglawog sa iyang baboy apan upat ka wala mailhing armadong mga tawo ang kalit nangabot ug dayong namusil sa biktima.
Pagka alas 5:30 sa buntag sa susamang adlaw, gisunod sa pagpusil-patay ang magtiayon nga silang Rodrigo Pasinabo Lubay, 48, ug Cerelina, 44, sa Sitio Lower Budlasan, Barangay Trinidad.
Sigon sa anak sa mga biktima, didto sa sapa ang ilang amahan nga si Rodrigo, 50 metros gikan sa ilang panimay, aron maligo apan kalit lang kini nga gipusil.
Ang ilang inahan nga si Cerelina nga nakadungog sa buto sa armas, niapas kini sa sapa apan siya na usab ang gipusil.
Pagka alas 6:00 sa buntag sa Sitio Agit sa maong barangay, gipusil si Ronelo Lara Quirante Sr., 56, samtang nanugway kini sa iyang baka.
Samtang pagka alas 8:30 sa buntag, si Gretchel Ferolino Ledesma, gipusil usab sa mga armado sa Sitio Taklongan, Barangay Linatuyan.
Nagbaktas ang biktima uban sa iyang anak ug ilang silingan nga si Mary Jane Paborada aron moadto sa barangay proper ug ihatod ang module sa iyang anak.
Ilang nasugatan ang grupo sa mga armado sa hilit nga dapit. Apan sigun sa usa sa mga saksi, iyang nabati ang lalakeng armado “NPA ko, tug-an mos mga police kay gubat jud ni ron,” nga maoy hinungdan sa iyang pagdagan.
Gidala pa si Gretchel sa tambalanan sa siyudad sa Guihulngan apan gideklara kini nga patay na sa dihang nadangat.
Padayon pa sa ilang imbestigasyon ang kapulisan sa Negros Oriental labot sa mga pangalan sa mga suspetsado alang sa pagpasaka unyag kaso ngadto sa korte. (AYB)