Niapilar ang Provincial Board (PB) sa Sugbo ngadto sa Regional Inter-Agency Task Force (RIATF) ug sa Department of the Interior and Local Government (DILG) nga ipadayon na ang tigbakay sa lalawigan ug ipasaka kini ngadto sa kaulohan.
Nipasar og resolusyon ang PB ug usa ka ordinansahon pinaagi ni PB Member Celestino Martinez III atol sa ika-15 nga regular session niadtong Mayo 3, 2021.
Niadtong Oktubre 15, 2021, gitugotan na sa Inter-Agency Task Force for the Management of Emerging Infectious Diseases (IATF-MEID) ang tigbakay o sabong sa nasod labi na sa lugar ubos sa modified general community quarantine (MGCQ) apan kinahanglan gihapon mosubay sa health protocol.
Apan, niadtong Abril tungod sa nagkasaka nga kaso sa Covid-19 sa nasod, gibawi sa IATF ang pagtugot sa sabong, gawas sa nagpahigayon og e-sabong, nga adunay lisensya gikan sa Philippine Amusement and Gaming Corporation (Pagcor).
Tungod niini, niapilar ang 23 ka mga cockpit operator gikan sa lainlaing mga lungsod ug siyudad sa probinsya sa Sugbo ngadto sa opisina ni Presidente Rodrigo Duterte pinaagi sa usa ka ordinansahon nga tugotan na sila sa pagbalik og abli.
Matod nila, nikabat og bilyones ang alkansi sa mga operator ug daghang mga empleyado ang naapektuhan sama sa breeders, farmlands, poultry supplies, ug uban pa.
Gawas nila, gikuhaan sab og panginabuhi ang mga sentenciador, gaffers bet takers, cock doctors ug cockpit vendors.
Dili lang ang probinsya nga gobyerno ang naghimo og ordinansahon nga adunay susamang katuyoan, ang Cebu City Gamefowl Commission kauban sa Emergency Operations Center (EOC), mihangyo sab nga itugot na ang tigbakay.
Gisaysay sa ordinansahon nga angay na nga tugotan ang Sugbo nga mag-abli sa ilang cockpit tungod maayo na ang Covid-19 nga sitwasyon sa lugar gani, bisan paman nga ikaduha kini sa Covid-19 epicenter sa nasod, dali ra nga ni-us os ang kaso niini bisan mas gipaluagan ang ubang mga protocol.
Gawas sa RIATF ug sa DILG 7, gihatagan sab si Provincial Governor Gwendolyn Garcia ug si Presidential Spokesperson Harry Roque Jr. og kopya sa maong ordinansahon. (KFD)