HUMAN sa dul-an walo ka buwan sukad nakaplagan ang nagkadaiyang bahin sa lawas sa tawo, nakompirmar ug nailhan na ang babaye nga gi-chop-chop sa pagpatay niadtong tungatunga sa Oktubre sa miaging tuig.
Nailhan ang lawas ni Angelie Lopez Kintanar pinaagi sa deoxyribonucleic acid (DNA) ug dental records nga gihuptan sa kapulisan.
Mao kini ang gibutyag ni Ronald Lopez, igsuon ni Angelie, sa iyang Facebook post sa Mayo 14, 2021 aron pagpangayog panabang nga mahatagan og hustisya ang kamatayon sa iyang igsuon.
Matod ni Ronald, nailhan si Angelie pinaagi sa test sa DNA ug pagtandi sa dental records gamit ang ulo sa tawo nga nakaplagan niadtong Oktubre 30, 2020 sa Cabahug Wharf, Brgy. Looc, Mandaue City nga giphimo sa Scene of the Crime Operatives (Soco) sa Philippine National Police (PNP).
“Si Angelie Lopez Kintanar po yung kapatid ko na chinap-chop. Nakumpirma po ito ng Soco na siya yung chinapchop sa pamamagitan ng dental records at DNA niya,” matod ni Ronald sa iyang post.
Nangayog panabang si Ronald sa media tungod kay hinay ang pagdagan sa kaso sa pagpatay sa igsuon.
“Napapansin ko kasi pag may media na papasok sa kaso, may progress po yung kaso,” pagpasabot ni Ronald.
Sa pagsusi sa Superbalita Cebu gamit ang social media, nasuta ning mantalaan nga si Angelie, minyo, dunay usa ka buok anak, naa sa negusyo sa realty.
Nagpuyo sila sa usa ka subdivision sa Barangay Tipolo, Mandaue City.
Matod ni Ronald nga gituohan sa medico-legal sa Soco nga si Angelie gipatay sa mga petsa Oktubre 19-22, 2020.
Nakaplagan ang lawas ni Angelie niadtong Oktubre 24, 2020 nga way ulo, mga kamot ug tiil sa sapa sa sityo Kalubihan, Barangay Talamban, Dakbayan sa Sugbo.
Ang lawas gisulod sa usa ka sako ug gituohang gipaanod sa sapa.
Sa Oktubre 23, nakaplagan usab ang usa ka kamot ug tiil sa dagat sa may Ouano Wharf sa Looc, Mandaue City.
Nianang Oktubre 30, 2020, katapusang nakaplagan ang ulo ni Angelie sa Cabahug Wharf.
Base sa ulo nga nakit-an, nasuta nga babaye ang tag-iya kay tag-as ang buhok ug blonde ang kolor. Nitakdo usab sa usa sa mga Facebook post ni Angelie niadtong Marso 7, 2020 nga blonde ang iyang buhok.
Human makaplagi ang body parts, nagtuo ang kapulisan nga usa ra ang tag-iya sa mga bahin sa lawas sa tawo nga nakaplagan.
Niadtong higayuna, nagtuo ang kapulisan sa Talamban Police Station nga gipaanod ang lawas ni Angelie kay nianang gabii sa Oktubre 23, 2020 kusog ang uwan nga nagpakusog usab sa bul-og sa tubig sa sapa.
NAGDUDA
Matod sa usa ka tinubdan nga nihangyo sa Superbalita Cebu nga di nganlan, nahibung sila nga wa na motubag si Angelie sa ilang mga private message, labina sa ilang group chat nga unta aktibo man kini.
Sila nagtuo nga duna nay dautang nahitabo kang Angelie.
Matod niya, katapusang nakit-an si Angelie sa Oktubre 18, 2020.
Naka-post pa usab kini sa iyang Instagram account sa wa pa ma-missing.
Dugang sa tinubdan nga bisan nahibaw-an na sa kapulisan nga ang tag-iya sa body parts nga nakaplagan mao si Angelie, hinay nga niirog ang kaso hinungdan nga ang pamilya magpatabang sa magsisibya nga si Raffy Tulfo.
Ang Superbalita Cebu ni-chat ug ni text sa mga igsuon ni Angelie, apan sa pagsuwat ning taho, wa pa sila motubag. (REV)