DIGOS CITY -- Wala pa mailhi ang kalabera sa tawo nga nabangalan sa mga mananagat naglutaw-lutaw sa Dawis Beach didto sa Purok Kitong, alas 12:55 sa kaadlawon, Dominggo, Mayo 16.
Sumala ni Lieutenant Colonel Vici Anthony Tababa, hepe sa Digos City Police Station (DCPS), nga pipila ka mananagat ug barangay sa tanod sa lugar ang nakadiskubre sa maong kalabera ug daling nipahibawo sa kapulisan.
Nadiskubrehan ang kalabera dihang gianod sa kusog nga balod padung sa baybayon, asoy ni Tababa.
Gumikan niini, nanawagan ang mga awtoridad niadtong mga pamilya nga nawad-an og kabanay sud sa pipila ka bulan nga makig-alayon sa ilang buhatan aron nga mailhan ang biktima.
Hinuon, gidala na sa Mariscal Funeral Homes ang kalabera aron mahatagan og disenteng lubong ugaling wa nay kabanay nga mokuha niini sa ilang buhatan.
Apan di pa masuta sa kapulisan ang hinungdan sa kamatayon sa biktima. (Orlando B. Dinoy)