"TOO much love will kill you" ba gayod? Sikat nga linya sa awit nga igsama sa nahitabo sa usa ka 23 anyos kinsa mihunos sa iyang kinabuhi gumikan sa tumang selos sa uyab.
Giingong wa kaantus ang usa ka lalaki ug nagpakamatay kini didto sa Roseville Subdivision, Barangay Angliongto, siyudad sa Davao, Mayo 16.
Ang biktima usa ka alyas Ramil, 23 anyos, construction worker, taga Malita, Davao Occidental.
Perte na lang kurata sa usa ka testigo nga si Fedito Garcia human makita ang biktima nga wala nay kinabuhi.
Dugang saysay sab sa usa ka kauban niyang si Alvin Sacnan nga una pa man ang hitabo, nadungog nila ang biktima nga kaistorya ang karelasyon sa cellphone kay naka-loud speaker kini.
Suma pa nasuko ang biktima ug gilabay ang cellphone niini sa salog.
Gidala ang lawas sa biktima sa Rivera funeral Homes samtang gihulat ang mga kabanay niini.
Kung ikaw may kailang nanginahanglan og tabang, o ikaw mismo nanginahanglan og masultihan sa imong gihambin nga emosyon, mamahimo nimo ni sila nga makontak: DOH Suicide Prevention hotlines: 0917-899-8727 (USAP) 0917-989-8727 (USAP).