Hingpit nga naangkon sa Utah Jazz ang No. 1 overall standing human nila gipangmakmak ang host Sacramento Kings, 121-99, kagahapon, Mayo 17, 2021 (RP time) atol sa pagsiklop sa regular season sa National Basketball Association (NBA).
Ang Jazz, nga ninghuman sa regular season dala ang 52-20 nga rekord, maggunit og homecourt advantage sa kinatibuk-ang playoffs diin ikaharong nila ang mahimong No. 8 team sa Western Conference sa 1st round.
Apan dili kuntento ang Jazz sa ilang nakab-ot ug tinguha nilang makapakita og maayong kombati sa playoffs aron makabawi sila sa ilang nasinati sa miaging tuig diin wala sila nakalusot sa 1st round.
Ning higayuna, malaumon ang Jazz nga makaabot sila sa finals.
“Going through what we went through last year, I learned to enjoy every moment,” matod sa usa sa mga pambato sa Jazz nga si Rudy Gobert.
“That doesnt mean you don’t prepare for what’s coming. Just enjoy the moment.”
Kini maoy labing unang higayon nga naangkon sa Jazz ang No. 1 overall ranking.
Kuyaw na sab nga nakaduwa ang Fil-Am nga si Jordan Clarkson ug nimugna kini’g 33 ka mga puntos aron pangulohan ang Jazz.
“It’s definitely a great feeling because we know we put a lot into it,” batbat ni Clarkson.
“It started in the bubble (last year) and then through this year with guys going out, guys coming back, everybody staying tough and going through it. We’ve got bigger goals. We’re trying to play big-time in the playoffs.”
Aduna pa’y unom ka mga magduduwa ang Jazz nga ningmugna og dobleng numero nga puntos.
Ang Kings, nga usa teams nga nanamilit bawon ang 31-41 nga rekord, gipangulohan ni Terence Davis pinaagi sa iyang 20 puntos. (AP)